Aravot.am-ը Բագրատ եպիսկոպոս Գալստանյանից հետաքրքրվեց, թե ինչպիսի տպավորություն ունի սեպտեմբերի 24-ից մեկնարկած Հայ եկեղեցու եպիսկոպոսաց ժողովից: «Երկրորդ օրն է, որ եպիսկոպոսաց ժողովը երկու հայրապետների օրհնության եւ հովանավորության ներքո գումարվել է Մայր աթոռում: Երեկ ամբողջ օրը նվիրվեց Հայոց ցեղասպանության նահատակներ սրբադասման կարգի հաստատման քննարկմանը: Այսօր առավոտվանից քննարկվում է մկրտության կարգի կամ ծեսի խորհուրդը, համապատասխան ավանդության շարունակություն ունենալու մտահոգությամբ եւ սկզբունքով: Շատ աշխույժ քննարկումներ են, ժողովական լավ մթնոլորտ»,-ասաց Բագրատ սրբազանը:
Նա հավելեց, որ մեծ ծավալի աշխատանք է տարված թե ժողովի պատրաստման եւ թե քննարկումների համար, ու ինքը հույս ունի, որ այս օրերին եպիսկոպոսաց ժողովն իր առաքելությունը կկատարի եւ որոշումներ կկայացվի այդ հարցերի վերաբերյալ:
Aravot.am-ը հետաքրքրվեց՝ այս երկու օրերին շոշափվե՞լ են «կնճռոտ» հարցեր: «Կնճռոտ» հարցեր չեն շոշափվել, քննարկվել են միայն այդ երկու հարցերը: Ամսի 27-ին երկու զեկուցում է նախատեսված՝ Օշական սրբազան Չոլոյանի եւ իմ: Թեման լինելու է այսօրվա հայ եկեղեցին՝ ժամանակակից մարտահրավերների առջեւ եւ քննարկվելու են թե Սփյուռքում, թե Հայաստանում ընդհանրապես այսօրվա իրականության մեջ եղած մարտահրավերները: Ինչպե՞ս է հայ եկեղեցին պատրաստվում դիմագրավել, կեցվածք արտահայտել դրա վերաբերյալ»,-հայտնեց սրբազանը:
Անդրադառնալով եպիսկոպոսաց ժողովի բացմանը հնչած Ամենայն հայոց վեհափառ հայրապետի խոսքին հոգեւորականը այն որակեց ուղենշային՝ մարտահրավերների նկատմամբ ունեցած վերաբերմունքի իմաստով: Նաեւ հույս հայտնեց, որ ամսի 27-ի քննարկումների ժամանակ լուծումներ կառաջարկվեն եւ դրանք նյութ կդառնան գալիք եպիսկոպոսաց ժողովի համար:
Կարդացեք նաև
Հավելենք, որ Ն.Ս.Օ.Տ.Տ. Արամ Ա. Մեծի տանն Կիլիկիո վեհափառ հայրապետն էլ եպիսկոպոսաց ժողովի ժամանակ կոչ էր արել եկեղեցու վերքերը ճիշտ տեսնելու եւ ցավերը ճիշտ զգալու քաջություն ունենալ, քանի որ, ըստ նրա, հաջողության գրավականը նաեւ ինքնաքննադատությունն է ու նրա ձեւակերպմամբ, «Հայ եկեղեցւոյ ծիսական կեանքէն ներս խոր արմատներ նետած թերութիւններու սրբագրումը»:
Գոհար ՀԱԿՈԲՅԱՆ
