Որտե՞ղ է մաքսակետը դրվելու`ղարաբաղա-ադրբեջանական, թե հայաստանա-ղարաբաղյան սահմանին: Այսօր այս հարցը հայ լրագրողները հնչեցրեցին «Նովոստի» միջազգային մամուլի կենտրոնում կազմակերպված Երևան–Մոսկվա տեսակամուրջի ժամանակ՝ մանրամասնելով մաքսակետի տեղակայման հնարավոր տարբերակների դեպքում առաջացող խնդիրները: Հարցը, բնականաբար, ուղղված էր ռուսական կողմի ներկայացուցիչներին: Իսկ տեսակամուրջի թեման էր՝ «Եվրասիական նախագիծ` Հայաստանի համար. տնտեսական առավելություններն ու հանրային երկխոսությունը»:
Եվրասիական տնտեսական հանձնաժողովի ինտեգրման զարգացման դեպարտամենտի տնօրեն Վիկտոր Սպասկին այսպես պատասխանեց հարցին. «Ես կարծում եմ, որ ՌԴ-ն չէ, որ պետք է մաքսակետ դնի: Եթե Հայաստանը կարծում է, որ որ սահմանն անցնում է ղարաբաղա-ադրբեջանական սահմանով, ապա, բնականաբար, դա հայկական կողմի պայմանն է եւ ՌԴ-ն այդ պայմանի առկայությամբ պետք է Հայաստանի հետ խաղա: Պետք չէ վերաբերվել ՌԴ-ին իբրեւ մի սուբյեկտի, որը քաղաքական պայմաններ է պարտադրում Հայաստանին»:
Միջոցառման համակարգող, «Հյուսիս–Հարավ» քաղաքական կենտրոնի գործադիր տնօրեն Ալեքսեյ Վլասովն էլ նկատեց, որ մաքսակետի հարցը Հայաստան-ԵՄ բանակցություններում էլ կար. «Բայց Բրյուսելի կողմից ես ինչ-որ հստակ պատասխաններ չլսեցի այս թեմայի շուրջ: Ինձ թվում է այս հարցը սադրիչ է»: Նա ոչ կոռեկտ է համարում նման հարցադրումն այժմ, երբ բարձրագույն մակարդակում քաղաքական հարցերի մանրամասները չեն քննարկվել:
«Ինտեգրացիա և զարգացում» հ/կ նախագահ Արամ Սաֆարյանն էլ նկատեց, որ ակնհայտ է, որ Հայաստանի որեւէ իշխանություն չի ընդունի որեւէ տնտեսական, քաղաքական կամ այլ որոշում՝ ԼՂՀ-ի անկախության եւ անվտանգության հաշվին: Նա կարծիք հայտնեց, որ առաջիկայում էլ ԼՂՀ հարցի խաղաղ կարգավորման հանգուցալուծման հասնելու իր մանդատը ԵԱՀԿ Մինսկի խումբը կպահպանի:
Կարդացեք նաև
Նելլի ԳՐԻԳՈՐՅԱՆ
