Այս պահին Մատենադարանի նոր մասնաշենքում պատմամշակութային ժառանգության պահպանման հիմնախնդիրները թեմայով միջազգային փորձագետները գիտաժողով են անում: Իսկ Նախախորհրդարանի մի խումբ ակտիվիստներ Մատենադարանի շենքի դիմաց գիտաժողովի մասնակիցների ուշադրությունն են հրավիրում «Ծածկած շուկայի» եւ ոչնչացվող այլ հուշարձանների վրա:
«Կոչ ենք անում բոլոր մտահոգ մարդկանց ճնշումներ գործադրեն պատկան կառույցների վրա, որ «Ծածկած շուկան» վերականգնի իր նախկին տեսքը եւ մնա պատմամշակութային հուշարձան: Նման տեմպերով եթե ոչնչացնենք մեր պատմությունն ու մշակույթը ապա վաղը չենք ունենա ոչ պատմություն, ոչ մշակույթ եւ որպես ազգ կվերանանք երկրի երեսից: «Ծածկած շուկան» հուշարձան է, որը ոչնչացվում է օլիգարխի կողմից»,- ասաց ակտիվիստ Գեւորգ Սաֆարյանը:
Նրա խոսքերով, պատմամշակութային հուշարձանները չպետք է սուպերմարկետ դառնան, այն էլ՝ արտաքին տեսքի խաթարման հաշվին. «Եթե «Ծածկած շուկան» բոլորիս աչքի առջեւ ոչնչացվում է, ապա նման գիտաժողովները որեւէ իմաստ չունեն, քանի որ գործնականում որեւէ ազդեցություն դրանք չեն ունենում: Շուկայի արտաքին տեսքը լրիվ փոխվել է, լուսամուտները շարված են, ներքին տեսքը նույնպես փոխված է: Կոչ ենք անում բոլորին միանալ եւ պահպանել մեր հուշարձանները: Մենք բարձր ենք գնահատում նման միջազգային գիտաժողովները եւ կոչ ենք անում բոլոր մասնակիցներին իրենց ներդրումն ունենալ Հայաստանի պատմամշակութային հուշարձանների պահպանման գործում: Եթե մեր պետական կառույցներն ի վիճակի չեն Երեւանի կենտրոնում պաշտպանել հուշարձանը, ապա ինչպե՞ս ենք պաշտպանելու մեր հուշարձանները մարզերում եւ մեր երկրի տարածքներից դուրս: Բոլորս ընդվզեցինք, երբ ադրբեջանցի զինվորները Ջուղայում քանդեցին մեր հուշարձանները, բայց բարոյական ի՞նչ իրավունքով, եթե մենք ինքներս ենք անում մեր երկրի կենտրոնում: Քանի դեռ մեր հուշարձանները քանդվում են հայի ձեռքով, մենք իրավունք չենք ունենալու թշնամուն մեղադրել, որ մեր հուշարձանը քանդում են»:
Գիտաշխատող, գիտաժողովի մասնակից Գարեգին Ղազարյանը դրսում հանդիպեց ակտիվիստներին եւ ասաց, որ իրենց բարձրացնելով չէ ոչնչացվող հուշարձանների խնդիրը լուծվում. «Պետական պատժիչ մեքենան չկա, որ հանցագործին պատժի… Մշակույթի դաշտի գործիչները որոշիչ դեր չունեն: Մի մարդ է որոշում, ու դուք լավ գիտեք, թե ով է»:
Կարդացեք նաև
Արփինե ՍԻՄՈՆՅԱՆ
Մանրամասները՝ շուտով տեսանյութում
