Այսօր «Նովոստի» միջազգային մամուլի կենտրոնում կազմակերպված Երևան–Մոսկվա տեսակամուրջի ժամանակ Հայաստանի պետական տնտեսագիտական համալսարանի տնտեսամաթեմատիկական մեթոդների ամբիոնի վարիչ Աշոտ Թավադյանը միանգամայն համաձայնեց իր ռուս գործընկերների այն դիտարկումների հետ, որ Հայաստանի՝ Մաքսային միությանն անդամակցությունը այնպիսի տնտեսական առավելություններ կբերի Հայաստանին, որ ընդհանուր սահմանի բացակայության բոլոր «բացերը» կլրացնի:
Փոխարենը, «Ինտեգրացիա և զարգացում» ՀԿ նախագահ Արամ Սաֆարյանը հարցի քաղաքական ասպեկտին առնչվող բավականին ուշագրավ հարցեր բարձրացրեց, որոնց պատասխանները ռուսական կողմից չհնչեցին: Կբացվի՞ աբխազական երկաթուղին ՌԴ-ի եւ Վրաստանի, Վրաստանի եւ Հայաստանի, Վրաստանի եւ Աբխազիայի երկխոսության արդյունքում եւ այլն: Ի՞նչ լուծում կստանան հայ-իրանական երկաթուղային եւ ավտոճանապարհային հարցերը եւ այլն: Արամ Սաֆարյանը գտնում է, որ բոլոր ցավոտ հարցերը պետք է քննարկվեն հատկապես Հայաստանի՝ Մաքսային միությանն անդամակցելու ցանկությունից հետո եւ այն փաստաթուղթը, որը կստորագրվի, պետք է շատ թափանցիկ լինի, որպեսզի հասարակությունը հասկանա, որ Մաքսային միությանն անդամակցության գործընթացն իրեն պետք է, որ դրական բաներ է տալու:
«Նորավանք» գիտակրթական հիմնադրամի փոխտնօրեն Սևակ Սարուխանյանի մոտեցումները՝ Մաքսային միությանն անդամակցության մասին՝ տեսանյութում:
Նելլի ԳՐԻԳՈՐՅԱՆ
