Հատված ԱԼՎԱՐԴ ՊԵՏՐՈՍՅԱՆԻ հետ հարցազրույցից:
-Ի՞նչ կարծիքի եք Մաքսային միությանը Հայաստանի անդամակցության մասին։
-Ասվում է, թե հարցը պետք է ներկայացնել հանրաքվեի: Համոզված եմ, որ մեր ժողովրդի 95 տոկոսից ավելին կքվեարկի հօգուտ Մաքսային միության։ Ինչո՞ւ, որովհետեւ իր մտածողությամբ շատ ավելի ռուսական կողմնորոշում ունի։ Եթե ես լինեի նախագահ, կասեի՝ հանրաքվե անցկացրեք ու ինքս իմ վրայից կվերցնեի այդ պատասխանատվությունը:
Բայց սա դեռ մի կողմ թողնենք, գոյություն ունի մի պարզ հարց՝ ո՞նց պետք է ռուսական սահմանապահ զորամասը պաշտպանի մեր սահմանները, երբ մենք մերժում ենք այդ երկրի առաջարկությունը, ո՞նց կլինի, որ էներգակիրներով կախված լինենք Ռուսաստանից ու իրենց ասենք՝ ոչ: Այդպես չի լինում:
Բայց կա այլ խնդիր, այլ ճշմարտություն. ինչքան մեզ պետք է Ռուսաստանը իր էներգակիրներով, սահմանապահ զորքերով, նույնքան էլ մենք ենք իրեն պետք: Մանավանդ պուտինյան Ռուսաստանը շատ պրագմատիկ է, երբեք հենց այնպես քայլ չի անում: Պուտինի նման պրագմատիկը, որի համար ամեն ինչ հաշվարկված է, ինչո՞ւ է ուզում, որ Հայաստանը մտնի Մաքսային միության մեջ: Եթե մենք այդքան վատն ենք, փոքր ենք, ինչո՞ւ է ուզում մեզ իր տիրույթում ունենալ:
Այ, հենց այս հարցին պատասխանենք, կհասկանանք, որ շահերը երկուստեք են, ու մենք չպետք է մոռանանք հայկական գործոնը: Չինաստանը գիտակցում է հայկական սեպի կարեւորությունը թուրանական վտանգի առաջ, իսկ մենք զարմանալիորեն չենք հասկանում:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
