Եվ այսպես, Հայաստանի քաղաքացիները կարող են շնորհավորել միմյանց, երկրի արտաքին պարտքը հասավ 5 միլիարդ դոլարի։ Բանն այն է, որ կառավարությունը 700 միլիոն դոլարի «եվրապարտատոմսեր» է թոդարկել։ Պարզ ասած՝ ով ուզում է Հայաստանին պարտքով փող տալ, գնում է այդ պարտատոմսերը։ Կառավարությունն էլ, ենթադրաբար, մտադիր է դրանով փակել 500 միլիոն դոլարանոց ռուսական պարտքը, որը վերցրել էր՝ իբր տնտեսությունը ոտքի կանգնեցնելու եւ փոքր ու միջին բիզնեսին աջակցելու նպատակով։ Աջակցությունն այնքան բուռն էր, որ հազարավոր փոքր ու միջին ձեռնարկություններ պարզապես փակվեցին, բայց դա արդեն էական չէ։
Փաստորեն, Տիգրան Սարգսյանը (բնականաբար՝ Սերժ Սարգսյանի համաձայնությամբ) հինգ տարվա ընթացքում երկուսուկես անգամ ավելի շատ պարտք է վերցրել, քան դրան նախորդած 17 տարիների ընթացքում։ Սա այն գումարն է, որը պիտի վճարեն մեր սերունդները, որովհետեւ այդ 5 միլիարդի բեռն է, որ թույլ չի տալու բարձրացնել աշխատավարձերն ու թոշակները, ստիպելու է բարձրացնել եղած հարկերն ու նորերը հորինել եւ այլն։
Բայց Տիգրան Սարգսյանը որեւէ մեկի կարծիքը չի հարցնում նոր պարտք վերցնելուց առաջ, ոչ էլ իրեն պարտավորված է համարում բացատրել, թե ինչի վրա է պատրաստվում ծախսել այդ գումարները։
Մարկ ՆՇԱՆՅԱՆ
Կարդացեք նաև
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
