Կինոռեժիսոր Ռիչարդ Սարաֆյանը, որն առավել հայտնի է իր «Անհետացման եզրին գտնվող կետ» (Vanishing Point) ֆիլմով, մահացել է սեպտեմբերի 18-ին, Սանտա Մոնիկայում: Նա 83 տարեկան էր: Հաղորդում է «Վաշինգտոն Փոստ» թերթը:
Նրա ազգականները հայտնել են, որ թոքաբորբի ժամանակ նա կոտրել էր ողնաշարը:
Նա բազմաթիվ ֆիլմեր է նկարահանել, իսկ գործունեության ավելի վաղ ժամանակաշրջանում եղել է «Ատրճանակի ծուխը», «Մթնշաղի գոտին» և «Բեթմեն» հեռուստասերիալների ռեժիսորը:
Նրան մեծ ճանաչում է բերել «Անհետացման եզրին գտնվող կետը» ֆիլմը, որը Կովալսկի անունով մի կոպիտ տղայի մասին է, որը խելագար ճանապարհորդություն է ունենում Դենվերից դեպի Սան Ֆրանցիսկո:
Կարդացեք նաև
Քվենթին Տարանտինոն հատուկ շնորհակալություն է հայտնել Սարաֆյանին «Անհետացման եզրին գտնվող կետ» ֆիլմով իր վրա ազդեցություն թողնելու համար, որի շնորհիվ նա նկարահանել է «Մահվան ապացույց» ֆիլմը:
1997թ. շոտլանդական «Primal Scream» խումբը հարգանքի տուրք է մատուցել Սարաֆյանին՝ իրենց ալբոմը կոչելով «անհետացման եզրին գտնվող կետ»:
Ռիչարդ Գասպար Սարաֆյանը ծնվել է 1930թ. ապրիլի 28-ին հայ գաղթականների ընտանիքում: Նա սովորել է Նյու Յորքի համալսարանում, սակայն «անպետք ուսանող է եղել» մինչև չի սկսել մասնակցել ռեժիսուրայի և սցենարի դասընթացներին՝ «Ես արդեն A (գերազանց) էի ստանում», պատմել է նա «Արմենիան Ռիփորթեր»-ին 2008թ.:
Նա ամուսնացել է (բաժանվել, հետո վերաամուսնացել) ռեժիսոր Ռոբերտ Ալթմանի քրոջ՝ Հելեն Ջոան Ալթմանի հետ: Նրանք ունեցել են 5 երեխա: Ջոան Ալթմանը մահացել է երկու տարի առաջ:
Պատրաստեց Հովհաննես ԻՇԽԱՆՅԱՆԸ
