«Փաստինֆո». «Դատական ակտերի հարկադիր կատարման մասին» օրենքի 24-րդ հոդվածի 1-ին մասը համապատասխանում է Սահմանադրությանը հետևյալ մեկնաբանությամբ. «քաղաքացի-պահանջատեր» եզրույթն իրավակիրառական պրակտիկայում պետք է մեկնաբանել և կիրառել, հաշվի առնելով, որ այն վերաբերում է նաև իրավաբանական անձանց: Այսօր նման որոշում կայացրեց Սահմանադրական դատարանը, ելնելով «ՎՏԲ-Հայաստան Բանկ» ՓԲԸ-ի դիմումի հիման վրա գործի քննության արդյունքներից:
Միաժամանակ ՍԴ-ն իր որոշման մեջ ամրագրեց, որ դիմողի նկատմամբ կիրառված վերջնական դատական ակտն օրենքով սահմանված կարգով ենթակա է վերանայման: ՍԴ-ի որոշումը վերջնական է և ուժի մեջ է մտնում հրապարակման պահից:
Բանկի կողմից վիճարկված դրույթով սահմանվում է, որ քաղաքացի-պահանջատիրոջ կողմից կատարողական թերթի կատարման ներկայացնելու ժամկետը հարգելի ճանաչված պատճառներով բաց թողնելու դեպքում դատարանը կարող է այն վերականգնել: Ինչպես «Փաստինֆո»-ն ավելի վաղ հայտնել էր, «ՎՏԲ-Հայաստան Բանկ» ՓԲԸ-ն անցած տարի դիմել է Լոռու մարզի ընդհանուր իրավասության դատարան, պահանջելով հարգելի համարել ԴԱՀԿ ծառայություն կատարողական թերթ ներկայացնելու համար բաց թողնված ժամկետը՝ հաշվի առնելով այն հանգամանքը, որ օրենքով սահմանված ժամկետում դիմել է, սակայն կատարողական թերթը ժամանակին չի ստացել:
Նյութի մանրամասները կարդացեք սկզբնաղբյուր կայքում
