Ազատամարտիկ Կարեն Մելիքբեկյանը ԳԱԼԱ TV-ի հետ զրույցում տեղեկացրել է, որ Վոլոդյա Ավետիսյանին ազատ արձակելու պահանջով ազատամարտիկների ստորագրահավաքին միանալու են նաեւ ԱԺ պատգամավորներ: «Ստորագրահավաքին կմասնակցեն ոչ միայն ազատամարտիկները, այլ նաև ԱԺ պատգամավորները, որոնք երաշխավորագրի տեսքով կներկայացնեն իրենց ստորագրությունները` Վոլոդյա Ավետիսյանին ազատ արձակելու պահանջով»,- ասել է նա:
Aravot.am-ը փորձեց ճշտել, թե ԱԺ պատգամավորներից հատկապես ովքե՞ր են պատրաստվում միանալ ստորագրահավաքին: Հետաքրքիր էր, բայց մեզ հետ զրուցած պատգամավորներն առաջին անգամ էին լսում նման նախաձեռնության մասին:
Ենթադրվում էր, որ նման քայլ կարող էին անել ԲՀԿ խմբակցության պատգամավորները, քանի որ երեկ ազատամարտիկները հանդիպել էին ԲՀԿ առաջնորդ Գագիկ Ծառուկյանի հետ: Սակայն ԲՀԿ խմբակցության քարտուղար Նաիրա Զոհրաբյանն Aravot.am-ի հետ զրույցում ասաց, որ ինքն անտեղյակ է նման մտադրություններից:
Նման նախաձեռնությունից անտեղյակ էին նաեւ ՀՀԿ խմբակցության քարտուղար Հովհաննես Սահակյանը, «Ժառանգություն» խմբակցության ղեկավար Ռուբիկ Հակոբյանը, ՀԱԿ խմբակցության պատգամավոր Գագիկ Ջհանգիրյանը:
Կարդացեք նաև
Ավելին, մեր զրուցակիցներից ոմանք անգամ թերահավատորեն արտահայտվեցին պատգամավորների՝ ստորագրահավաքին միանալու հավանականությանը:
Նելլի ԳՐԻԳՈՐՅԱՆ
