Թուրքիայից Հայաստան 7 տեսակի սննդամթերք է թույլատրվում ներմուծել, որը սահմանային անցակետում ստուգման չի ենթարկվում, բավարար են միայն այդ ապրանքների ուղեկցող փաստաթղթերը, ըստ որոնց, այդ սննդատեսակներն անվտանգ են: Նման որոշում այս տարվա հունիսին կայացրեց գյուղատնտեսության նախարար Սերգո Կարապետյանը, որը չեղյալ համարեց նախկինում թույլատրող իր այն որոշումը, որի համաձայն այդ սննդամթերքներն արգելվում էին ներմուծել: Որոշման հիմնավորումը, ըստ նախարարության, այն է, որ արգելքի դեպքում կեղծ փաստաթղթերով թուրքական սննդամթերք էր ներմուծվում Հայաստան:
«Իրազեկ եւ պաշտպանված սպառող» հասարակական կազմակերպության նախագահ Բաբկեն Պիպոյանն այսօր «Արմատ» ակումբում հարց բարձրացրեց` ինչու մենք պետք է վստահենք Թուրքիային, որի ապրանքների անվտանգության փաստաթղթերով Հայաստան կներմուծվի սննդամթերք, իսկ մենք տեղում` անցակետում փորձաքննության չենք ենթարկելու.«Թուրքիան եւ Ադրբեջանը հո Իտալիան կամ Ֆրանսիան չե՞ն, որ սննդամթերքի անվտանգության ուղեկցող փաստաթղթերին հավատանք, իսկ գուցե Թուրքիայում մասնավո՞րն է տրամադրել ուղեկցող փաստաթղթերը և ինչքանո՞վ են դրանք հավաստի»:
Հ/Կ-ի նախագահը անդրադառնալով գյուղնախարարության հիմնավորմանն ասաց, որ եթե կեղծ փաստաթղթերով սննդամթերք է ներմուծվել, ապա սահմանային անցակետում ինչո՞վ են զբաղվում այդ 200 աշխատակիցները:
Մանրամասն` տեսանյութում
Կարդացեք նաև
Բացի այս, պարոն Պիպոյանի խոսքերով` շատ հայեր չեն ցանկանա թուրքական վարունգ կամ լոլիկ գնել, սակայն այստեղ էլ հարց է առաջանում` «Արդյոք վերահսկողություն իրականացնող մարմինը կարողանալու է ապահովել, որպեսզի այդ սննդամթերքը, հիմնականում բանջարաբոստանային, որը որ չունի մակնշում, ինչը պարտադիր է, իրացման ցանցում տարանջատված լինի տեղականից»:
Բաբկեն Պիպոյանի խոսքերով` ըստ սննդամթերքի անվտանգության պետական տեսչության, հունիսի 7-ից մինչ օրս ադրբեջանական ծագման ապրանքներ չեն բերվել Հայաստան, իսկ Թուրքիայից ներմուծվել է կիտրոն, մաստակի տեսականի, խմորիչ, սննդային հավելումներ, պարենային եգիպտացորենի հատիկներ, ընդ որում լաբորատոր փորձաքննության են ենթարկվել միայն մաստակները. «Քանի որ անվտանգության փաստաթղթերը չեն բավարարել կառավարության որոշման պահանջները: Այսինքն մնացած ապրանքները ներկրվել են առանց լաբորատոր փորձաքննության: Հիմա առանձնահատուկ ուշադրության եմ հրավիրում խմորիչի վրա. կարելի է հարեւան երկրից, որի հետ սահմանը տարիներով փակ է, առանց փորձաքննության խմորիչ թողնել մեր երկիր, ես դեմ չեմ, բայց թող բացեիբաց հայտարարեն, որ մեզ համար Թուրքիան լրիվ հավասարազոր է Իտալիային, Ֆրանսիային»:
Ըստ Բաբկեն Պիպոյանի, եթե անգամ սննդի անվտանգության պետական տեսչությունը սահմանին փորձաքննություն չի անում, ապա իրացման ցանցում պարտավոր է, ինչը կրկին չի անում:
Բաբկեն Պիպոյանը տեսչությանն առաջարկել է մի իրավական փաստաթուղթ, որով բուսասանիտարական մթերքների նկատմամբ հսկողության կարգ պետք է ընդունվեր, սակայն այն այդպես էլ չընդունվեց. իսկ թե ինչո՞ւ եւ ում է ձեռնտու նման վիճակը Հայաստանում, Aravot.am-ի հարցի պատասխանը` շուտով տեսանյութում
Նելլի ԲԱԲԱՅԱՆ
