«Այս տարի Ադրբեջանի նախագահի ընտրությունները հետաքրքիր են, քանի որ գրանցված են 21 թեկնածուներ, այնինչ նախորդ ընտրությունների ժամանակ նրանք ընդամենը 7-ն էին: Սա Արևմուտքին ապացուցելու փորձ է, քանի որ Ադրբեջանում գիտակցում են, որ նրանցից հաշված մարդիկ են ունակ ընտրազանգված հավաքել, լուրջ դիմադրություն ցույց տալ Իլհամ Ալիևին»,-այսօր «Նոյյան տապան» մամուլի ակումբում հայտարարեց ադրբեջանագետ Սարգիս Ասատրյանը:
Կանխատեսումներ անելով՝ ադրբեջանագետն ասաց, որ ամենայն հավանականությամբ՝ ցույցեր, դժգոհություններ ու բողոքողներ կլինեն:
Խոսքի ազատության աստիճանի վերաբերյալ համեմատություններ տանելով ՀՀ-ի և Ադրբեջանի միջև, Սարգիս Ասատրյանը նշեց, որ իրավիճակն անհամեմատելի է:
Սահմանում դիվերսիոն գործողությունների դիմելու հավանականությունը ադրբեջանագետն այսպես գնահատեց. «Հնարավոր են նաև դիվերսիոն գործողություններ, քանի որ Ադրբեջանը սահմանում դիվերսիոն գործողությունների է դիմում ցանկացած լուրջ իրադարձությունից առաջ»:
Կարդացեք նաև
Aravot.am-ը հետաքրքրվեց՝ համամի՞տ է արդյոք ՀՀ նախագահ Սերժ Սարգսյանի այն կարծիքին, թե ՀՀ-ի համար Ադրբեջանի նախագահի առավել նախընտրելի թեկնածու է Իլհամ Ալիևը, Սարգիս Ասատրյանը պատասխանեց. «Նախագահի թեկնածուներից նրանք, ովքեր գոնե աղոտ շանս ունեն Ադրբեջանի նախագահ դառնալու, նրանց մեջ չեմ տեսնում մի քաղաքական գործչի, որը կարող է շեղվել հակահայկական ալիքից: Պարզից էլ պարզ է, որ անգամ եթե Ալիևը չլինի, այլ մեկ ուրիշը, ապա դրանից զուտ հայերի նկատմամբ վերաբերմունքի առումով դժվար թե մի բան փոխվի: Նախագահն այս իմաստով ճիշտ է ասում: Ռուստամ Իբրահիմբեկովը, որը թվում էր, թե դրական էր տրամադրված հայերի նկատմամբ, իր տեղը զիջեց հակահայկական տրամադրված գործչի»:
Տաթև ՀԱՐՈՒԹՅՈՒՆՅԱՆ
