«Լեւոն Զուրաբյանը նախ չգիտի ՀՀՇ-ն ինչ է: Ոչ թե նրա համար, որ նա այդ ժամանակ փոքր էր եւ ՀՀՇ-ի անդամ երբեք չի եղել, այլ ինքը ուղղակի չգիտի ՀՀՇ-ն ինչ է: Ես փորձեմ բացատրել»,- Aravot.am -ի հետ զրույցում ՀՀՇ վարչության նախկին անդամ Հովհաննես Իգիթյանն այսպես մեկնաբանեց ՀԱԿ խմբակցության ղեկավար Լեւոն Զուրաբյանի այն պնդմանը, որ ՀՀՇ-ն այլ քաղաքական ուժերի հետ միավորվել է ՀԱԿ կուսակցության մեջ, ՀԱԿ կուսակցության ե՛ւ մասն է կազմում, ե՛ւ պատմական անցյալի մասն է կազմում:
Լեւոն Զուրաբյանը նաեւ ասել էր, որ «ՀՀՇ-ն ճնշող մեծամասնությամբ, պահպանելով օրենքի բոլոր կանոնները, մոտավորապես մի քանի 100 ձայնը՝ 6-ի դեմ ընդունել է որոշում՝ վերակազմավորվելու, մաս դառնալու ՀԱԿ-ին: Նրանք, ովքեր իրավունք ունեին եւ ունեն խոսելու Հայոց համազգային շարժման անունից, այդ մարդիկ արտահայտվել են: Արտահայտվել են այնպես, որ բոլոր ընդդիմախոսներին կարելի է ջախջախված համարել: Եթե դեմ է քվեարկել ընդամենը 6 մարդ, դա արդեն ցույց է տալիս, թե ով ինչ իրավունքներ ունի խոսելու: Չեն կարող փոքրամասնության տարբեր խավեր, որոնք տարբեր էտապներում անջատվել են, հայտ ներկայացնեն այն մարդկանց իրավունքների նկատմամբ, որոնք անդավաճան, սկզբից մինչեւ վերջ եղել են այդ կուսակցության մեջ»:
Ըստ Հովհաննես Իգիթյանի, նշանակություն չունի, թե քանի հոգի են քվեարկել. «Հարցը դա չէ: Այն մարդիկ, որոնք կարող էին դեմ խոսել, նրանք արդեն դուրս են մղվել ՀՀՇ-ից, ընդ որում՝ ոչ պարկեշտ ձեւով: Ցավն այն է, որ ես ոչ թե Լեւոն Զուրաբյանին պետք է բացատրեմ, այլ այն մարդկանց, որոնք չգիտեն, թե ՀՀՇ-ն ինչպես է աշխատել, ներսում չեն եղել: ՀՀՇ-ում ցանկացած հարց կոլեգիալ ձեւով էր քննարկվում: Մենք երբեք չենք սպասել, որ գար մեկը, մեզ մի գաղափար առաջարկեր, մենք էլ այդ գաղափարին սկսեինք արձագանքել ու տառապել: Մենք եղել ենք թիմ, թիմում ամեն մեկն ուներ մի կարծիք եւ իր կարծիքը պաշտպանում էր, առաջ էր տանում: Այստեղ պաշտոնները, քաղաքական դիրքը կարեւոր չէր: Համակրանքը կամ քծնանքը երբեք չի եղել առաջնահերթ՝ ՀՀՇ-ում կարծիք արտահայտելու համար: Վատը դա է, որ մի կուսակցություն է ստեղծվել եւ բոլորը համաձայն են, ոչ մեկը իր կարծիքը չի ունեցել»:
Պարոն Իգիթյանը սա համեմատեց Մաքսային միություն մտնելու որոշման հետ. «Հայաստանի համար կարեւոր, իմ կարծիքով բացասական քայլ է անում Սերժ Սարգսյանը, ընդդիմադիրների ուղին սպասում է, թե Լեւոն Տեր-Պետրոսյանն ինչ կասի, որ նրանք սկսեն Լեւոն Տեր-Պետրոսյանի ասածները կրկնեն: Մի ուղի, որ 45 հոգի քաղաքական գործիչներ ունի վարչության մեջ: ՀՀՇ-ում այդպես չէր: Երբ որ մենք ասում ենք, որ վերականգնենք ՀՀՇ-ն, մենք ասում ենք՝ վերականգնենք այդ մթնոլորտը: Այդպիսի կարծիք թող չստեղծվի, որ ինչպես ամուսնալուծման ժամանակ են մարդիկ խոսում գույքի, գումարների բաժանման մասին, այստեղ այդպիսի հարց չկա: Եթե իրավահաջորդության մասին ենք ասում, մենք փորձում ենք վերականգնել մեր պատմական շարժումը, պատմական շարժման մթնոլորտը, որը, մեր կարծիքով, ՀԱԿ-ում բացարձակապես գոյություն չունի: Շատ մարդիկ, որ ժամանակին դուրս են մղվել, չեն տեղավորվել այդ նոր ստեղծված կուսակցության մեջ եւ որոշել են կազմել նոր կուսակցություն: Անկախ այն բանից՝ մենք իրավաբանորեն գրանցվել ենք, թե ոչ, նույնիսկ այն փոքր թիմով, որ մենք այսօր աշխատում ենք, կարելի է տեսնել մեր կարծիքները՝ տարբեր հարցերի շուրջ: Նրանք կարող են տարբեր լինել եւ մեկը մյուսի վրա չազդող: Չկա որեւէ մեկը, որ մեզ ֆինանսավորում է կամ մեզ թելադրում է, թե մենք ինչ ասենք կամ ինչպես ասենք կամ որ թերթին դա ասենք»:
Կարդացեք նաև
Մեր հարցին՝ հիմա, երբ ՀԱԿ-ն ասում է, որ ՀՀՇ-ն իրենց մի մասն է, եւ Դուք էլ ստեղծում եք նոր ՀՀՇ, քաղաքացին ինչպե՞ս տարբերի՝ ո՞րն է իսկական ՀՀՇ-ն, նախորդի շարունակությունը՝ Հովհաննես Իգիթյանը պատասխանեց. «Շատ հեշտ: ՀՀՇ գոյություն չունի: Գոյություն ունի ՀԱԿ կուսակցություն: ՀԱԿ-ը ՀՀՇ-ն չէ, նույնիսկ գաղափարական ուղղվածությամբ ՀՀՇ-ից շատ հեռու է, որովհետեւ ՀՀՇ-ի հիմքում դրված էր եվրոպական չափանիշները, եվրոպական ինտեգրացումը: Եթե ՀԱԿ-ը լիներ ՀՀՇ, ապա ՀԱԿ-ն այսօր առաջինը պետք է բողոքեր եւ ըմբոստանար Մաքսային միության անդամության դեմ, որն այնքան էլ չի երեւում»:
Հռիփսիմե ՋԵԲԵՋՅԱՆ
