«Երթը հստակ նախաձեռնող խումբ չուներ, դեմոկրատական սկզբունքով էր: Երեք անգամ Մաշտոցի պուրակում հավաք արեցին և որոշեցինք, որ նման ձեւաչափով հավաքվենք: Դա անկախությանը սպառնացող վտանգների դեմ էր, և քանի որ վերջին վտանգը Մաքսային միությանն անդամակցելու որոշումն էր՝ այսքանով երթը նաև Մաքսային միության դեմ էր»,-Aravot.am-ի հետ զրույցում անդրադառնալով սեպտեմբերի 21-ին կազմակերպված «Անկախության երթ»-ին՝ «Անկախության երթ»-ի նախաձեռնող խմբի անդամ Մարինե Պետրոսյանն այսպես պարզաբանեց ՀԱԿ անդամ Կարեն Թովմասյանի այն պնդումները՝ համաձայն որոնց, երթն ուղղված էր Սերժ Սարգսյանի դեմ:
Մանրամասնելով՝ Մ. Պետրոսյանը նշեց. «Մարդիկ կային, որ չէին ուզում շեշտել, որ երթը Սերժ Սարգսյանի դեմ էր, մյուսները չէին ուզում շեշտել, որ Մաքսային միությանն էր դեմ: Ուստի այս իմաստով միավորեցինք և շեշտադրումն ու ձևակերպումն արեցինք այնպես, որ երթը սեպտեմբերի 3-ի հայտարարությանն էր դեմ: Յուրաքանչյուր ոք իր կարծիքն էր հայտնում, դրա համար խայտաբղետ պատկեր ստացվեց»:
Անձամբ Մարինե Պետրոսյանը կտրուկ դեմ է Սերժ Սարգսյանի սեպտեմբերի 3-ի հայտարարությանը: Հստակեցնելով միտքը՝ մեր զրուցակիցը նշեց. «Կտրուկ դեմ եմ ոչ միայն այն պատճառով, որ որոշումն ապագայում կարող է ինքնիշխանությանը խանգարել, այլև դեմ եմ հայտարարության ձևին, երբ չորս տարի Ասոցացման համաձայնագրի մասին ես խոսում, հետո մեկ րոպեում որոշում ես փոխում: Սա նշանակում է, որ ինքնիշխանությունը կորցրել ես: Ուստի պետք է դնել Սերժ Սարգսյանի հեռացման հարցը: Միայն այդ դեպքում կվերադառնա ինքնիշխանությունը»:
Անդրադառնալով երթի ընթացքին՝ Մարինե Պետրոսյանն ասաց. «Ոստիկանները պահանջում էին, որ մայթ բարձրանանք: Դա վիրավորական էր, հոգեբանորեն էլ էր տհաճ, երբ քեզ հրում են մայթ, ուստի բնական մղումով բոլորը գալիս էին դեպի փողոց, և դա լավ էր: Այդպես էլ պիտի լիներ, քանի որ այն էլ Անկախության օրով չէիր կարող ճնշված լինել, որ ոստիկանները երկու կողմից գնային, և դու բանտարկված քայլեիր: Բաղրամյան 26-ին չթողեցին մոտենալ, ոմանք այդտեղ էլ էին ուզում ճեղքել, դա բնական ցանկություն էր, ես էլ կուզենայի, բայց թույլ չտվեցին»:
Կարդացեք նաև
Խոսելով հետագա քայլերի մասին՝ Մարինե Պետրոսյանը տեղեկացրեց, որ այսօր հավաքվելու են Մաշտոցի պուրակում և քննարկելու հետագա քայլերը:
Տաթև ՀԱՐՈՒԹՅՈՒՆՅԱՆ
Լուսանկարը՝ Մարինե Պետրոսյանի Ֆեյսբուքյան էջից
