«Սպիտակի երկրաշարժից անցել է 25 տարի: Սպիտակի երկրաշարժից ամեն օր հեռանալը մեզ մոտեցնում է նոր ուժեղ՝ հաջորդ երկրաշարժին»,-այսպիսի կանխատեսում արեց ԱԻՆ «Սեյսմիկ պաշտպանության ծառայություն» գործակալության պետի տեղակալ Աշխեն Թովմասյանը: Նրա խոսքերով, միեւնույն է՝ մեկ տարի հետո, 5 տարի հետո, թե տասնամյակ հետո՝ ուժեղ երկրաշարժ լինելու է:
Այսօր «Հենարան» ակումբում տիկին Թովմասյանն ասաց, որ վերջին 9 ամիսներին տարածաշրջանում շուրջ 3 հազար երկրաշարժ է տեղի ունեցել: Հայաստանում սեյսմիկ վտանգն այսօր գնահատվել է 9 բալ եւ ավելի, չնայած դրան, կառուցապատման ժամանակ կառուցապատողները չեն պահպանում շինարարական նորմերը:
Ասուլիսի մեկ այլ մասնակցի՝ «Սեյսմիկ պաշտպանության արեւմտյան ծառայության» ՊՈԱԿ շենք -շինությունների սեյսմակայունության բաժնի պետ Գուրգեն Նամալյանի ներկայացմամբ, այսօր հանրապետության շենքերի 50 տոկոսը վտանգված է նույնիսկ յոթ բալ երկրաշարժի դեպքում, քանի որ Խորհրդային տարիներին դրանք կառուցվել են յոթ բալանոց երկրաշարժի համար: Ըստ նրա՝ կառուցապատման նորմատիվներով շենքերը միմյանցից պետք է բաժանված լինեն հակասեյսմիկ կարանով, սակայն անգամ դա չի պահպանվում եւ հակառակը՝ շենքերը կառուցվում են առավելագույն խտությամբ: Ճիշտ է՝ 2006 թվականին սեյսմակայունության վերաբերյալ նորմերը վերանայվել են, բայց պարոն Նամալյանը կարծում է, որ այն անընդհատ բարելավման կարիք ունի՝ ժամանակի պահանջին համապատասխան. «Այդ նորմերը պետք է լրամշակվեն եւ պետք է դրվեն պարտադիր պահանջներ»:
Ըստ պարոն Նամալյանի, հատկապես խոցելի են 11 եւ 9 հարկանի 111 շենքեր:
Տիկին Թովմասյանի խոսքերով, շատ ավելի վատ կլիներ, որ սեպտեմբերին Վրաստանում եւ Թուրքիայում տեղի ունեցած երկրաշարժերը չլինեին:
Կարդացեք նաև
Ըստ նրա, վտանգավոր հեռավորության երկրաշարժեր մեր երկրին այս պահին չի սպառնում:
Հարցին՝ մոտալուտ երկրաշարժը կանխատեսելի՞ Է, որքան ժամանակ առաջ կարող են կանխատեսել երկրաշարժը, տիկին Թովմասյանն ասաց, որ ամեն օր մինչեւ ժամը 11-ը կատարվում է սեյսմիկ իրավիճակի գնահատում եւ երկրաշարժը կարող են կանխատեսել առաջիկա երկու շաբաթվա համար:
Լուսինե ԲՈՒԴԱՂՅԱՆ
