Սեպտեմբերի 20, 2013 թ., Վարդենիկ – ԵՄ դասընթացը Հայաստանի ավագ դպրոցների համար պաշտոնապես մեկնարկեց ուրբաթ`սեպտեմբերի 20 –ին, Վարդենիկի ավագ դպրոցում: Դասընթացը մշակվել է ԵՄ կենտրոնի կողմից ՀՀ կրթության և գիտության նախարարության հետ համատեղ՝ երիտասարդների շրջանում բարձրացնելու ԵՄ – Հայաստան համագործակցության մասին գիտելիքների մակարդակը:
Հայաստանում ԵՄ պատվիրակության քաղաքական, տնտեսական, մամուլի և տեղեկատվության բաժնի ղեկավար Դիրկ Լորենցը նշեց, որ դասընթացը մշակվել է այնպես, որ լինի գրավիչ և ուշագրավ:
«Աշակերտներին պատրաստի լուծումներ առաջարկելու փոխարեն մենք նրանց հրավիրում ենք ուսումնասիրել թեմաները ուսուցման նորարարական մեթոդների միջոցով», ասաց պրն. Լորենցը:
ԵՄ դասընթացն օգտագործում է ծրագրերի վրա հիմնված դասավանդման մեթոդներ: Այն բաղկացած է 12 թեմատիկ դասերից, որոնք ինտեգրվելու են արդեն առկա պատմության, աշխարհագրության, հասարակագիտության և օտար լեզուների դասընթացներում: Բացի այդ, կլինեն 15 ուսումնական միջոցառումներ, որտեղ ուսանողները պետք է աշխատեն ինքնուրույն:
Կարդացեք նաև
Ըստ Կրթության և գիտության նախարարության Զարգացման ծրագրերի և մոնիտորինգի վարչության պետի տեղակալ Արկադի Պապոյանի, նախարարությունը կարևորում է Հայաստանում ԵՄ կենտրոնի հետ համագործակցությունը ՝ ավագ դպրոցների համար ԵՄ դասընթացի շրջանակներում:
«Այս դասընթացն աշակերտներին հնարավորություն է տալիս աշակերտներին խորացնելու իրենց գիտելիքները ԵՄ – Հայաստան համագործակցության վերաբերյալ», ասաց պրն. Պապոյանը:
«Հուսով ենք, որ այս ծրագիրը հաջողություն կունենա, և մենք կկարողանանք տարածել դասընթացը նաև Հայաստանի մյուս դպրոցներում՝ փորձնական փուլից հետո», հավելեց նա:
2013/2014 ուսումնական տարում դասընթացը կանցկացվի 12 փորձնական ավագ դպրոցներում, որոնցից չորսը Երևանում և ութը՝ մարզերում. Վարդենիկ (Գեղարքունիք), Աշտարակ (Արագածոտն), Վաղարշապատ (Արմավիր), Վանաձոր (Լոռի), Հրազդան (Կոտայք), Իջևան (Տավուշ), Դիլիջան (Տավուշ) և Ախուրյան (Շիրակ):
12 փորձնական դպրոցների աշակերտները և ուսուցիչները մասնակցեցին դասընթացի մեկնարկի արարողությանը և ներկայացրին իրենց աշխատանքները ԵՄ խորհրդանիշների վերաբերյալ, որ նախապատրաստել էին ուսուցողական միջոցառման ընթացքում:
Վարդենիկի ավագ դպրոցի 12 – րդ դասարանի աշակերտ Հակոբ Ղազարյանը նշեց, որ ուսումնական միջոցառումը շատ հետաքրքիր էր և ուսանելի: «Շատ հետաքրքրական էր ավելին սովորել ԵՄ դրոշի, օրհներգի ու նշանաբանի մասին և օգտագործել այդ նշանները մեր ստեղծագործական աշխատանքում», ասաց Հակոբը:
«Մենք ոգևորված ենք ավելին իմանալու Եվրամիության մասին և թե ինչ է ԵՄ -ը Հայաստանում անելու առաջիկա ամիսներին», ավելացրեց նա:
ԵՄ դասընթացը մշակվել է ԵՄ կենտրոնի և ՀՀ կրթության և գիտության նախարարության միջև 2013 թ-ի հունիսի 26-ին ստորագրված «Համագործակցության հուշագրի» շրջանակներում:
ԵՄ Կենտրոնը ԵՄ կողմից ֆինանսավորվող «Աջակցություն ԵՄ հաղորդակցությանը` Հայաստանում բարեփոխումների վերաբերյալ» ծրագրի հիմնական բաղկացուցիչն է։ Կենտրոնի նպատակն է բարձրացնելլ իրազեկությունը Հայաստանում ԵՄ զարգացման համագործակցության մասին և աջակցել ԵՄ մասին կրթությանը: Կենտրոնի կայքէջը Հայաստանի հետ ԵՄ համագործակցության հիմնական հարթակն է։ Ծրագրի տևողությունը 2 տարի է:
ԵՄ կենտրոնի մամուլի հաղորդագրություն
