«Հայ ազգը չորս անգամ վերակերտել է իր անկախությունը եւ բոլորին հայտնի է, որ անկախությունը ոչ ոքի նվեր չեն տալիս, այն պետք է ձեռք բերել բազկի ուժով: Անկախության համար մենք բազում զոհեր ենք տվել, անկախության համար բազում արյան գետակներ են հոսել»,-այս մասին այսօր «Տեսակետ» ակումբում ասաց «Արցախյան պատերազմի մասնակից կանայք» ՀԿ-ի նախագահ, գնդապետ Աիդա Սերոբյանը` հավելելով, որ այսօրվա խաղաղ կյանքը, երբ բոլորը հանգիստ դասի ու աշխատանքի են գնում, անկախության շնորհիվ է:
Ըստ նրա, եթե երկիրը կանգնի վտանգի առաջ, ապա բոլորը պետք է ոտքի կանգնեն եւ զենք վերցնեն կին թե տղամարդ, ինչպես եղավ արցախյան ազատամարտի տարիներին, որի ընթացքում չորս հարյուր կանանցից քառասունը նահատակվեցին: «Ես կուզեի, որ մի փոքր ավելի շատ գնահատված եւ ուշադրության կենտրոնում լինեն ազատամարտիկները»,-ասաց Սերոբյանը:
Գ. Նժդեհի անվան թիվ 161 դպրոցի հայոց լեզվի եւ գրականության ուսուցչուհի Արմինե Ստեփանյանը (Դուշման Վարդանի քույրը) նշեց, որ վաղ առավոտյան եղել է Եռաբլուրում, ըստ նրա` նախքան անկախությունը դիմավորելը, պետք է այցելել Եռաբլուր: « Եղբորս նշանաբանն էր, որ եթե ամեն մարդ իր գործով զբաղվի, ամեն բան իր տեղում կլինի: Երբ այսօր կարողանում ենք ազատ խոսել, ազատ եւ այսքան խորությամբ իմանալ հայոց պատմությունը, որը մեր տարիներին անել չէինք կարողանում, ուրեմն այո, սա իմ պատկերացրած ազատությունն է»,-ընգծեց Ստեփանյանը` ցանկություն հայտնելով`« Ապագայի համար ես չեմ ուզում, որ մարդիկ եսակենտրոն լինեն»:
Քրիստինա ՄԻՐԶՈՅԱՆ
