Լույս կտեսնի The Beatles-ի՝ BBC-ի համար արված ձայնագրությունների նոր հավաքածու: Այս մասին սեպտեմբերի 12-ին հաղորդագրություն է տեղադրվել խմբի պաշտոնական կայքում: On Air – Live at the BBC Volume 2 հավաքածուն կթողարկվի նոյեմբերի 11-ին եւ բաղկացած կլինի երկու սկավառակից: Դրանցում տեղ կգտնի 63 կատարում: Երբ 1994-ին Capitol Records-ը մեծ շուքով թողարկեց The Beatles Live at the BBC հավաքածուն (որն անմիջապես գլխավորեց չարթերն եւ ընդամենը 6 շաբաթների ընթացքում վաճառվեց դրա 5 միլիոն օրինակ), բազմաթիվ երաժշտասերներ տխրությամբ էին նշում այն փաստը, որ երկու սկավառակներից բաղկացած այդ հավաքածուն միայն մակերեսաբար էր արտացոլում ձայնագրությունների այն հսկայական գանձարանը, որ 1962-ի մարտից 1965-ի հունիս ամիսների ժամանակահատվածում խումբն արել էր BBC-ի համար:
Այժմ Capitol Records-ը եւ The Beatles-ի Apple լեյբլը որոշել են լրացնել այդ բացը: Նոյեմբերի 11-ին թողարկվելիք On Air – Live at the BBC Volume 2-ում զետեղված կլինի 40 երգ, ինչպես նաեւ 23 խոսակցական հատված՝ հարցազրույցներ, երգերի ներկայացումներ եւ զրույցներ ստուդիայում: Դրա հետ միեւնույն ժամանակ լույս կտեսնի նաեւ 1994-ի հավաքածուի՝ ռեմասթերինգի ենթարկած տարբերակը: Նոր հավաքածուն կփորձի բավարարել The Beatles Live at the BBC-ի հետ կապված երկրպագուների դժգոհություններին: Առաջին հավաքածուում բացակայող The Beatles-ի այնպիսի խոշոր հիթեր, ինչպիսիք են She Loves You, Please Please Me, I Want to Hold Your Hand, And I Love Her եւ This Boy երգերը, ներկայացված կլինեն նոր հավաքածուի մեջ: Բացի այդ, On Air – Live at the BBC Volume 2-ում ներառված կլինեն նաեւ The Beatles-ի ձայնադարանի համար բոլորովին նոր կատարումներ, որոնց թվում են. Սթիվեն Ֆոսթերի Beautiful Dreamer-ի՝ խմբի տարբերակը, Չաք Բերիի I’m Talking About You երգի՝ Ջոն Լենոնի մատուցումը, Լիթլ Ռիչարդի Lucille-ը՝ Փոլ Մաքարթնիի կատարմամբ եւ Happy Birthday-ի բիթլզյան տարբերակը, որը խումբը կատարել էր BBC-ի Saturday Club հաղորդման տարեդարձը շնորհավորելու համար:
Ընդհանուր առմամբ, 1962-1965թթ. BBC-ի համար The Beatles-ը կատարել է 88 երգ, դրանցից շատերը՝ մի քանի անգամ: Դրանց թվում են 36 երգեր, որոնք խումբը երբեւէ չի ձայնագրել Abbey Road-ում: Սակայն BBC-ի ձայնագրությունները հատկանշական են նաեւ այն առումով, թե ինչպես էր խումբը դրանք անում: Ի սկզբանե դրանք կենդանի կատարումներ էին՝ հազվադեպ հետագա վոկալային հավելումներով: Այսպիսով, դրանք արտացոլում են խմբի համերգային նվագելաոճը եւ էապես տարբերվում են առավել «հղկված» ստուդիական ձայնագրություններից: Հետաքրքրական է նաեւ այն փաստը, որ BBC-ի համար ձայնագրությունները հազվադեպ էին կատարվում հանդիսատեսի ներկայությամբ, ի շնորհիվ որի դրանցից բացակայում են հանդիսատեսի հիսթերիկ բղավոցներն ու աղմուկը, ինչն առկա է The Beatles-ի՝ նշված ժամանակաշրջանի այլ պրոֆեսիոնալ համերգային ձայնագրություններում:
On Air – Live at the BBC Volume 2-ի հետ կապված այլ մանրամասների, թրեյլերի եւ երգացանկի հետ կարելի է ծանոթանալ The Beatles-ի պաշտոնական կայքում՝ https://www. thebeatles.com:
Հայկական ռոք ասոցիացիա
«Առավոտ» օրաթերթ
