«Առաջին անկախության վերականգնման օրը եղել է մայիսի 28-ը, այլ ոչ թե սեպտեմբերի 21-ը: Այն արհեստական նշանակված օր է: Մայիսի 28-ի նշանակությունը թերագնահատելը եղել է մեր ամենամեծ սխալը»,-այսօր «Նոյյան տապան» ակումբում հայտարարեց քաղաքագետ Սերգեյ Շաքարյանցը: Շարունակելով սեպտեմբերի 21-ի՝ որպես տոն նշելու հարցը՝ քաղաքագետը նկատեց. «Մենք սա տոն ենք համարում և արդեն 22 տարի ապրում այդպես: Բայց մյուս կողմից մենք պատմությունը վերածել ենք կեղծ կատեգորիայի, իբր թե պատմությունը ՀՀՇ-ից պիտի ստեղծվի, իբր նրանք են եկել ու ասել, որ հանրաքվեն պիտի սեպտեմբերին լինի և սեպտեմբերի 21-ին հռչակվի անկախությունը: Սա նրանց ամբիցիաների արդյունքն է»:
ՀՀ-ին պե՞տք է անկախությունը, թե՝ ոչ հարցին, պարոն Շաքարյանցը այսպես պատասխանեց. «Այն ազգերի համար, որոնք իրենց պատմական ազգային շահերն ու խնդիրները լուծված են համարում, գուցե իմաստ ունի հրաժարվել ինքնիշխանության տարրերից՝ հանուն գլոբալ աշխարհի: Բայց մեր ազգը նրանցից չէ, մենք պիտի հասկանանք, որ եթե ունես ազգային չլուծված խնդիրներ, ապա չի կարելի հրաժարվել քո անկախության իրավունքից»:
Սերգեյ Շաքարյանցի կարծիքով՝ անկախությունը մեզ տրվել է, քանի որ մենք մայիսի 28-ի նման չենք պայքարել հանուն անկախության: Քաղաքագետը նաև հիշեցրեց Արցախի հիմնահարցի մասին. «Եթե Արցախի հիմնահարցը 1987-88-ից չզարգացնեինք, ապա մեզ հետ հաշվի չէին նստի»:
Մաքսային միություն-Ասոցացման համաձայնագիր երկընտրանքի կապակցությամբ, քաղաքագետն ասաց. «Ո՞վ է ավելի ինքնիշխան կաթոլիկ կենտրոն, Իտալիա՞ն, որ նստած սպասում է, թե ինչ կասեն իրեն՝ արդյոք պե՞տք է ռմբակոծել Սիրիայի քրիստոնեական համայնքները, թե՞ մենք: Եթե ասոցացվենք, նույնիսկ Իրանի հարցում մենք մեր ինքնուրույնությունը կորցնելու ենք: Դուք կարծում եք, որ Եվրամիության տարածքում գործ կտա՞ն ՀՀ-ի գործազուրկներին, բա իրենց գործազուրկների՞ն ինչ են անելու: Միամտություն է մտածել, թե այնտեղ ՀՀ-ի համար դրախտավայր է բացվելու»:
Կարդացեք նաև
Տաթև ՀԱՐՈՒԹՅՈՒՆՅԱՆ
