«1991 թվականին, երբ Անկախության հանրաքվեն պիտի լիներ, պատկերացրեք՝ 700 հազար անտուն մարդ, ավիրված աղետի գոտի, էներգիա չկար, ճանապարհներ չկային, հեռուստատեսություն չկար, ոչ մի հաղորդակցության հնարավորություն չկար… ոչ մի բան չկար: Բայց 2 մլն 42 հազար մարդ այդ ծանր վիճակում եկավ եւ «Այո» ասաց անկախությանը»,- այսօր Հայաստանի Հանրապետության անկախության 22-ամյակին նվիրված ասուլիսում ասաց ԱԺ ՀԱԿ խմբակցության քարտուղար Արամ Մանուկյանը:
Հիշելով այն ժամանակների ծանր սոցիալ-տնտեսական իրավիճակը՝ փախստականներ, երկրաշարժից հիմնահատակ ավիրված աղետի գոտի, փլուզման եզրին կանգնած ՍՍՀՄ, պատերազմի շեմին կանգնած Հայաստան, պարոն Մանուկյանը նաեւ հիշեց այն ոգեւորությունը, այն պոռթկումը, այն հոգեւոր վերելքը, որում գտնվում էր Անկախությունը նվաճած հայ ժողովուրդը, երբ ընդամենը տաս հազար մարդ էր դեմ քվեարկել անկախությանը. «Քվեաթերթիկները անսահման էին, համարակալած չէին, որովհետեւ 1991 թվականին ոչ մեկի մտքով չէր կարող անցնել, որ քվեաթերթիկ կարելի է գողանալ, լցոնել կամ քվեաթերթիկի համար փող տալ, դա լրիվ ուրիշ բարոյական դաշտ էր: Հրաշք էր, աստվածային բան էր, երբ ամեն քաղաքացի ինքն իրեն զգում էր իր երկրի տերը, երկրի ճակատագիրը որոշող մարդ»: Այս խոսքերի հետ պարոն Մանուկյանը «Հայացք» ակումբում գտնվող լրագրողներին, որոնց թվում կային նաեւ 1991-ի հանրաքվեի ժամանակ դեռեւս չծնվածներ, ցույց տվեց հանրաքվեի «Այո» նշումով քվեաթերթիկը:
Իսկ օգոստոսի 23-ին Գերագույն խորհրդում իր ընթերցած Անկախության հռչակագրի մագաղաթյա մի օրինակ պարոն Մանուկյանը նվիրեց ներկաներից ամենաերիտասարդին՝ նկատելով, որ 1.am-ի լրագրողի ձեռքում՝ տարիքի բերումով, այդ մասունքը ավելի երկար կմնա:
Կարդացեք նաև
Մելանյա ԲԱՐՍԵՂՅԱՆ
