«Անկախությունն Աստծու կողմից մարդուն տրված ամենաբարձրագույն ցանկությունն ու իղձն է: Մեր պապերն ու հայրերը պայքարել են նրա համար, որ իրենց երեխաներն ու ծոռները լինեն ազատ, անկախ եւ ուրախ»,-այսօր լրագրողների հետ հանդիպման ժամանակ Անկախության 22 տարիներին մեր երկրի քարե պատկերի ու դեմքի մասին նշեց քանդակագործ Լեւոն Թոքմաջյանը:
Նրա խոսքով՝ անկախությունը հոգեբանական մտքի եւ բարոյականության ամենաբարձրագույն կատեգորիան է, սակայն անկախությունն ու ազատությունը պետք է ճիշտ օգտագործել: Նրանք նույնպես ունեն իրենց սահմանափակումները.
«Հայաստանում երջանիկ լինելու համար շատ պատճառներ կան, մեզանից յուրաքանչյուրը իրենից ինչ որ բան ներկայացնում է: Այսօր ուսանողությունը մեկնում է արտասահման ուսումը շարունակելու, եթե ուզենանք հայաստանյան իրավիճակում լավ բան փնտրել, ապա հաստատ կգտնենք»:
Ինչ վերաբերում է արտագաղթին, ապա քանդակագործի համոզմամբ աշխարհի բոլոր երկրներում արտագաղթ կա, այդ փաստը ցավագին չպետք է ընդունենք: Մարդ ծնվում եւ ապրում է մեկ անգամ, հետեւաբար իրավունք ունի աշխարհը շրջելու ու իր ցանկություններն իրականացնելու, դա չի նշանակում, որ հայը երկրից, աշխարհից վերանում է.
Կարդացեք նաև
«Հայ ժողովուրդը լրիվ ազատ չէ, փխրուն է, կարեւորը, որ նրա դիվանագիտությունն ու քաղաքականությունը ճկուն լինի, որ հնարավոր լինի ամեն ինչից օգտվել: Մեր մեջքին ոչ ոք կանգնած չէ, մենք դեռ հզոր չենք: Հազար երանի նրանց, ովքեր ականատես կլինեն իմ երազած անկախ Հայաստանին»:
Քանդակագործի պնդմամբ մենք անկախության համար չպայքարեցինք, մեզ տվեցին անկախություն: Մենք պետք է կարողանանք մեզ տված անկախությունն ու ազատությունը ճիշտ օգտագործել:
Անժելա ՇԱՀՈՒՄՅԱՆ
