Եվրոխորհրդարանի ռումինացի պատգամավոր Մոնիկա Մակովեյը և Եվրոպական քաղաքականության ռումինական կենտրոնի տնօրեն Կրիստիան Գինյան հայտարարել են, որ Մաքսային միություն մտնելով` Հայաստանի բնակչությունը «շատ թանկ է վճարելու` իշխանությունն օլիգարխիկ համակարգի ձեռքում կենտրոնացնելու տեսքով: Համակարգ, որը հեռու է եվրոպական արժեքներին միանալն ապահովող ցանկացած կանոնից»: Հայտնում է «Ռեգնում» լրատվական գործակալությունը:
Հայտարարության մեջ գործիչները կոչ են արել Ռումինիայի և ԵՄ քաղաքացիներին «ոչ» ասել Մոլդովայի դեմ ռուսական սպառնալիքներին ու գնել մոլդովական գինի, որը Ռուսաստանը հրաժարվել է ներմուծել:
Նման «համերաշխության գործողության» նպատակը Մոլդովային աջակցելն է «եվրոինտեգրման ճանապարհին», ասված է հաղորդագրության մեջ, որը «Ռեգնում»-ը ստացել է սեպտեմբերի 18-ին:
«Ռուսաստանի արգելք դնելը Մոլդովայի քաղաքացիներին ինքնիշխան ընտրության հնարավորությունից զրկելու կեղտոտ և անթույլատրելի փորձ է: Մոլդովայի գինիները փորձաքննություն են անցել Եվրոմիության առողջապահական հաստատություններում ու մտել են եվրոպական շուկա… այսպիսով, սա զուտ քաղաքական քայլ է, որը Մոլդովայի բնակչությանն ու քաղաքական գործիչներին վախեցնելու նպատակ ունի: Չթողնե՛նք նրանց միայնակ», – հայտարարել են հեղինակները` նշելով, որ նման ճնշումների է ենթարկվում նաև Ուկրաինան, իսկ Հայաստանն արդեն «հանձնվել է սպառնալիքների ճնշումից» և հայտարարել, որ կանդամակցի ՄՄ-ին:
Կարդացեք նաև
«Հայաստանը հանձնվեց, օգնենք Մոլդովային դիմադրել», – գրում են հեղինակները:
Պատրաստեց Հովհաննես ԻՇԽԱՆՅԱՆԸ
