Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը այս տարվա հունվարի 31-ին իրականացված Պարույր Հայրիկյանի դեմ մահափորձի գործով մտավ խորհրդակցական սենյակ:
Դատավճիռը կհրապարակվի սեպտեմբերի 23-ին:
Երկու ամբաստանյալները՝ Խաչատուր Պողոսյանն ու Սամվել Հարությունյանն իրենց վերջին խոսքում մեղավոր ճանաչեցին, որ վախեցնելու նպատակով կրակել են Հայրիկյանի վրա, իսկ Վարդան Սեդրակյանն ասաց, որ իրեն մեղավոր չի ճանաչում: «Չգիտեմ ինչու հավատացած եմ, որ դատարանը արդար վճիռ կկայացնի»,-ասաց նա:
«Որեւէ փաստ կա՞: 30-ականներին, երբ որեւէ մեկին մեղադրում էին սպանելու համար, գոնե մեկ ցուցմունք պիտի լիներ: Հիմա կա՞ մի ցուցմունք, որով մեկն ասեր ՝ Սեդրակյանը ցանկացել է սպանել Հայրիկյանին: Դատաքննության ժամանակ տրված ցուցմունքները արժանահավատ չեն համարում:
Կարդացեք նաև
Աբսուրդը որտեղ է, երբ երկուսը ձերբակալվել են, գտնվում են «Երևան Կենտրոն»-ում , որը ժողովրդին հայտնի է՝ ԿԳԲ-ի պադվալում, մեղմ ասած, չեն ունեցել անգամ պետական պաշտպան, նրանց ցուցմունքները պարոն դատախազը համարում է արժանահավատ, իսկ երբ դատավարություն է, ամբաստանյալները ունեն պաշտպաններ, լրատվամիջոցները լուսաբանում են այն, այս դեպքում, չգիտես ինչու նրանց ցուցմունքները արժանահավատ չեն համարում»,-ասաց Վ.Սեդրակյանը:
Այսօր դատարանում վերջին խոսքերի, պաշտպանական ճառերի ունկնդրմանը ներկա չէր տուժողը՝ Պարույր Հայրիկյանը, չնայած նրա ներկայացուցիչը՝ հայտնի փաստաբան Լեւոն Բաղդասարյանը ներկա էր նիստին:
Ռուզան ՄԻՆԱՍՅԱՆ
