«Սեպտեմբերի 3-ին Սերժ Սարգսյանը Մոսկվայում ցույց տվեց, որ բացարձակ կապ չունի ոչ հանրության հետ, ոչ իր թիմակիցների, ոչ այն մարդկանց հետ, ում հետ ինքը բանակցություններ էր վարում 4 տարի շարունակ: Խուլիգանական դիվանագիտություն վարելով՝ երկիր չես կառավարի: ՀՀ-ն ցանկություն է հայտնել դառնալ Մաքսային միության անդամ, սա Սերժ Սարգսյանի խոսքերն են, բայց ո՞վ է լսել նման ցանկություն, ինչպե՞ս է լինում, որ այդ մարդը միանձնյա իմանում է այդ ամենը եւ գնում պատմում իր վաղեմի ընկերոջը»,- այսօր Մաքսային միություն մտնելու մասին Արեւելյան գործընկերության քաղաքացիական հասարակության ֆորումի կազմակերպված Հայաստանի ազգային պլատֆորմի համաժողովի ժամանակ ասաց Ժուռնալիստների «Ասպարեզ» ակումբի նախագահ Լեւոն Բարսեղյանը:
«Ազատ դեմոկրատներ» կուսակցության նախագահ Խաչատուր Քոքոբելյանի խոսքերով՝ բոլորս ունենք համոզմունք՝ զարգացման ուղենիշի հետ կապված եւ պարտավոր ենք հետամուտ լինել դրանց. «Ես չեմ ուզում շանտաժի լեզվով խոսել կամ էլ կամ-կամ-ի տարբերակով տանել խնդիրը, բայց մեր շահը պիտի գիտակցենք: Գնալ Մաքսային միություն՝ դա ՀՀ անկախության դեմ ուղղված գործընթաց է: Երկու օրից պիտի տոնենք մեր անկախության 22-ամյակը, եւ այս մասին չխոսելը հանցավոր լռություն եմ համարում: Մեր Սահմանադրությունը, բարեբախտաբար, ՀՀ-ի նկատմամբ վերպետական մարմնի գործունեություն չի նախատեսում: Իսկ Մաքսային միությունն իր կանոնադրությամբ ունի տնտեսական կոմիտե, որը վերազգային մարմին է և որի որոշումները պարտադիր են անդամ պետությունների համար: Այդ կոմիտեն կարգավորելու է մեր տնտեսությունն ու տնտեսական հարաբերությունները երրրոդ երկրների հետ»:
Խաչատուր Քոքոբելյանն անդրադարձավ նաեւ այն դիտարկումներին, թե արդյոք ԵՄ Ասոցացման պայմանագիրը արգելքներ չի՞ նախատեսում: Նրա խոսքերով՝ «Ոչ, չի նախատեսում, այնտեղ խոսք է գնում ստանդարտների մասին, բայց ոչ երբեք սահմանափակումների: Ես հեռու եմ այն մտքից, որ Ասոցացման պայմանագրի ստորագրմամբ մենք ժողովրդավար և մրցունակ կդարձնենք Հայաստանի Հանրապետությունը, դա մենք պետք է անենք: Ուղղակի այդ պայմանագիրը այդ ճանապարհին մեզ տրվող հնարավորություն է և մենք ամեն ինչ պիտի անենք՝ այդ հնարավորությունից չզրկվելու համար: Որեւիցե ճնշում չի արդարացնում մեր իշխանությունների այն քայլը, որը մեր ինքնիշխանության դեմ է կատարվել: Անկախության կորուստը ամենամեծ վնասն է, եւ դրա մասին լռելը՝ ամենամեծ հանցագործությունը: Սարսափելի է պատկերացնել, թե այս արտագաղթի տեմպերի առումով մի 5-10 տարի հետո ինչ վիճակում է հայտնվելու մեր երկիրը, որովհետեւ ՀՀ քաղաքացին մեր ամենամեծ կապիտալն է»:
Կարդացեք նաև
Հռիփսիմե ՋԵԲԵՋՅԱՆ
“Խուլիգանական” վարքագծով երկրի նախագահ կդառնաս, – երկիր չես կառավարի՞