Ըստ Խաչատուր Քոքոբելյանի` այսուհետեւ Հայաստանի արտաքին քաղաքականությունը միաբեւեռ է
«Համաձայնություն» կենտրոնը եւ Ֆրիդրիխ Էբերտի անվան հիմնադրամն այսօր քննարկում էին կազմակերպել` «Երկխոսություն ԵՄ-ի հետ, հնարավորություններ եւ հեռանկարներ» թեմայով:
«Համաձայնություն» կենտրոնի ղեկավար Դավիթ Շահնազարյանը նշեց, որ հնարավոր է գտնել այնպիսի կարգավիճակ, որ Հայաստանը մնա Ասոցացման գործընթացում, քանի որ այդ փաստաթուղթը չի կարելի կորած փաստաթուղթ համարել: Այդ կարգավիճակն ավելի ցածր կլինի, քան Վրաստանին ու Մոլդովայինը, բայց Ադրբեջանից եւ Բելասռուսից բարձր կարգավիճակ կլինի: Նա նշեց, որ սա ամենեւին էլ անհնարին չէ դրա իրագործումը, եւ հույս հայտնեց, որ ՀՀ իշխանությունները կմասնակցեն Վիլնյուսի գագաթնաժողովին եւ կպահպանեն Հայաստանի տեղը Ասոցացման համաձայնագրի շրջանակներում:
Շահնազարյանը նշեց, որ բացառում է, որ Հայաստանը փաստացի դառնա Մաքսային միության լիարժեք անդամ. «Անհնար է լինելու դա իրականացրել, առայժմ ինչ կա հայտարարվել է սեպտեմբերի երեքին` ցանկությունների մասին արձանագրում էր», նշեց Դ.Շահնազարյանը:
Կարդացեք նաև
«Ազատ դեմոկրատներ» կուսակցության նախագահ Խաչատուր Քոքոբելյանը նշեց, որ չի կարելի սեպտեմբերի երեքի որոշումը ոչ արտառոց համարել, քանի որ Մաքսային միության որոշումները անդամ երկրներում պարտադիր կայացում են նախատեսում, այսինքն` Հայաստանի ինքնիշխանությանն ուղղված վտանգ է:
Նա նկատեց, որ անսպասելի չէր այս որոշումը: «Շատ են խոսում անվտանգությունից: Ինքնիշխանության կորուստը ավելի վտանգավոր է: Կրասնոդարը անվտանգության խնդիր չունի, բայց ի՞նչն ենք ինչի հետ համեմատում….», նկատեց Քոքոբելյանը` անդրադառնալով վերջին օրերին հնչող հիմնավորումներին: Նրա համոզմամբ այսուհետեւ Հայաստանի արտաքին քաղաքականությունը միաբեւեռ է:
Էմմա ԳԱԲՐԻԵԼՅԱՆ
