Հայ հեղափոխական դաշնակցություն կուսակցությունը, հաշվի առնելով Հայաստանում արտագաղթի բարձր ցուցանիշները, մշակել է «Մենք ապրելու ենք մեր երկրում» ծրագիրը, որի քննարկումը տեղի ունեցավ սեպտեմբերի 18-ին ՀՅԴ «Սիմոն Վրացյան» կենտրոնում: Քննարկմանը ներկա էին ազգագրագետներ և սոցիոլոգներ:
Ծրագիրը մշակվել է տնտեսագետներից և երիտասարդներից կազմված հանձնախմբի կողմից մի շարք սոցիոլոգների և ազգագրագետների աշխատությունների հիման վրա:
ՀՅԴ պատգամավոր Արծվիկ Մինասյանը հայտարարեց, որ ծրագիրն ավելի շատ ազգային է, քան կուսակցային: Պրն Մինասյանը շեշտեց, որ արտագաղթի կանխարգելման դեմ միջոցառումները կարող են հակառակ ազդեցությունն ունենալ, և իրատեսական չէ արտագաղթի միանգամից դադարելը.
«Ստեղծված իրավիճակում դա երկար ժամանակ է պահանջում: Անմիջապես պետք է քայլեր անենք այդ չարիքը կանխարգելու համար: Իրատեսական չենք համարում արտագաղթը կասեցնելը՝ վերացնելը, բայց տեմպերի նվազեցումը իրատեսական ենք համարում: Ազգային անվտանգության ռազմավարության հիմքում այս վիճակն արդեն դասվում է ազգային անվտանգության սպառնալիքների շարքում»:
Քննարկման ընթացքում Արծվիկ Մինասյանը ներկայացրեց արտագաղթի տվյալները և պատճառները: Ըստ Դաշնակցության՝ արտագաղթի արտածին պատճառներն են՝ հակահայկական քարոզչությունը, Հայաստանի տևական շրջափակումը, ոչ պատերազմ-ոչ խաղաղություն իրավիճակը:
Իսկ արտագաղթի դրդապատճառ կուսակցությունը համարում է քաղաքացիների աշխատանք չունենալը, բավարար վարձատրության և ապրուստի միջոցների և արդարության նկատմամբ հավատի բացակայությունը և Հայաստանում հեռանկար չտեսնելը:
Կարդացեք նաև
Ծրագիրն առաջարկում է տարանջատել բիզնեսն ու քաղաքականությունը, պետական պաշտոններից ազատել ցոփությամբ, թմրամոլությամբ և այլ նեգատիվ դրսևորումներ ունեցող անձանց, փոխարինել էթիկայի հանձնաժողովը հակակոռուպցիոն մարմնով, իրականացնել նոր վարչատարածքային բաժանում և այլն:
Ամի ՉՒՉԱԿՅԱՆ
