Երեկ Հայաստանի պատվիրակությունը վերադարձավ Ֆրանկոֆոնիայի միջազգային խաղերից:
Սեպտեմբերի 5-16-ը Ֆրանսիայի Նիս քաղաքում կայացած Ֆրանկոֆոնիայի 7-րդ միջազգային խաղերին 54 մասնակից երկիրների շարքում Հայաստանի Հանրապետության ազգային հավաքականը գրավեց 12-րդ տեղը:
Մեր մարզիկները յոթ մարզաձևերից մրցում էին հինգում՝ ազատ ոճի ըմբշամարտ, ձյուդո, հեծանվային սպորտ, սեղանի թենիս և ատլետիկա: Ազատ ոճի ըմբշամարտի մեր հավաքականը նվաճելով 3 ոսկի և 1 բրոնզե մեդալ՝ թիմային հաշվարկով գրավեց 2-րդ տեղը:
55 կգ քաշային կարգում մեր ոսկե մեդալակիրը Օհան Գիքինյանն է, ըմբշամարտիկ Նարեկ Սիրունյանը ոսկե մեդալ նվաճեց 66 կգ քաշային կարգում, իսկ Վիկտոր Կազիշվիլին ոսկե մեդալակիր դարձավ 96 կգ քաշայինում:
Կարդացեք նաև
Ի դեպ, միջոցառման հենց առաջին օրը մեզ համար նշանավորվեց ոսկե 3 մեդալներով , իսկ հաջորդ՝ երկրորդ օրը, 120կգ ծանր քաշային կարգում բրոնզակիր դարձավ ըմբշամարտիկ Անդրանիկ Գալստյանը:
Միջազգային հեղինակավոր այս ստուգատեսին մեր ձյուդոյի թիմը ներկայացել էր 3 մարզիկով և նվաճել է 2 բրոնզե մեդալ՝ Գրիգոր Իվանյանը 60 կգ քածային կարգում, Տիգրան Վարոսյանը 66կգ-ում:
Հեծանվային սպորտում ՀՀ հավաքականը մասնակցություն ապահովեց 5 մարզիկով, ատլետիկայում՝ 6-ով:
Մեր հավաքականի հեռացատկորդներից լավ արդյունք են ցույց տվել Արսեն Սարգսյանը և Վարդան Փահլևանյանը՝ համապատասխանաբար գրավելով 4-րդ և 5-րդ տեղերը: Սեղանի թենիսի 2 մասնակցից Հասմիկ Խաչատրյանը գրավել է 8-րդ տեղը:
Նշենք, որ 4 տարին մեկ անցկացվող Ֆարնկոֆոնիայի միջազգային խաղերին Հայաստանը մասնակցում էր երկրորդ անգամ: Նախորդ անգամ Լիբանանում կազմակերպված Ֆրանկոֆոնիայի 6-րդ միջազգային խաղերից հայ մարզիկները վերադարձել են 3՝ արծաթե և բրոնզե մեդալով:
Հիշեցնենք՝ hայաստանյան 36 հոգանոց պատվիրակությունը ղեկավարում էր Սպորտի և երիտասարդության հարցերի նախարար, աշխարհի ու օլիմպիական խաղերի բազմակի չեմպիոն Յուրի Վարդանյանը:
Սպորտի և երիտասարդության հարցերի նախարարության տեղեկատվության և հասարակայնության հետ կապերի բաժին
