«Որքան մարդ մեծանում է այնքան ավելի նպաստավոր է դառնում ուղեղի կաթվածի հավանականությունը:Ուղեղի կաթվածը` սպանող եւ հաշմանդամ դարձնող հիվանդություն է»,-այսօր Aravot.am-ի հետ զրույցում ասաց ԱՄՆ-ի Ատլանտայի բժշկական կենտրոնի նեյրոէնդովասկուլյար ծառայության ղեկավար Միքայել Գրիգորյանը:
Ըստ նրա, մարդիկ չհետեւելով տարրական խորհուրդներին` չծխել, բացառել աղի եւ շաքարի օգտագործումը, ակտիվ ֆիզիկական կյանք վարել,իրենց օրգանիզմում մեծացնում են ուղեղի կաթվածի ռիսկը:
Բժշկական համալսարանում տեղի ունեցած «Կաթվածի բուժում-2013» խորագրով միջազգային գիտաժողովի ժամանակ արտերկրից` ԱՄՆ-ից եւ Կանադայից հրավիրված բժիշկները ներկայացրին ուղեղի կաթվածի կանխարգելման եւ բուժման նոր մեթոդները:
Գիտաժողովը նվիրված էր գլխուղեղի արյան շրջանառության սուր խանգարումներին: Այս հիվանդության համար աշխարհում նոր դեղորայք է կիրառվում, բացի այդ՝ գլխուղեղի կաթվածը հայտնաբերելու եւ վերացնելու համար նոր տեխնոլոգիաներ են ներդրվել:
Կարդացեք նաև
Պարոն Գրիգորյանի խոսքերով,չնայած կան գործոններ, որոնցից մարդ ապահովագրված չէ, օրինակ` տղամարդիկ ավելի շատ են կաթված ստանում, ինչը գենետիկ տվյալներով, բարձրացնում է կաթվածի ռիսկի հավանականությունը: Մեծ է նաեւ գենետիկ տվյալները, կամ տարիքը, որքան մարդ մեծանում է այնքան ավելի նպաստավոր է դառնում ուղեղի կաթվածի հավանականությունը»:
Ալբերտայի համալսարանի նյարդաբանության ամբիոնի դոցենտ Միշել Սքոն Մուրաթօղլուն ասաց. «Հայաստանն այն երկրների շարքում է, որտեղ մեծ է կաթվածի հավանականությունը, այն կանխելու համար դեռ շատ գործ կա անելու»:
Նրա ներկայացրած վիճակագրությամբ,ամենաշատ կաթված ստացողները Ռուսաստանի, Ուկրաինայի, Հայաստանի բնակիչներն են, իսկ ցածր տվյալներով աչքի են ընկնում Կանադան, Ֆրանսիան:
Aravot.am-ի հետ զրույցում պարոն Գրիգորյանն ասաց, որ օրինակ` աղը բարձրացնում է արյան ճնշումը, որն էլ նպաստում է կաթվածի, խոլեսթերինն էլ արյան մեջ առաջացնում է թրոմբոզ, որը նույնպես հանգեցնում է գլխուղեղի կաթվածի: Ըստ նրա, ժամանակակից կյանքի ռիթմը, որը սթրեսների աղբյուր է, նույնպես նպաստում է կաթված ստանալուն. «Ճիշտ է կաթվածը չի սպանում, բայց հաշմանդամ է դարձնում մարդուն եւ չհետեւելու դեպքում կարող է հանգեցնել մահվան: Պետք է հասարակության գիտակցության մակարդակի բարձրացում տեղի ունենա եւ այն, թե ինչպիսի օգնություն է հարկավոր նման մարդուն, հիվանդանոցում էլ պետք է համապատասխան պայմաններ ստեղծել:
Որպես նյարդաբան` պարոն Գրիգորյանը, շատ վրդովում է, երբ մարդիկ կաթվածին այդքան ուշադրություն չեն դարձնում` մտածելով, որ ուղեղի կաթվածը անբուժելի է. «Ամեն մարդ պետք է ունենա ընտանեկան բժիշկ,եւ եթե այդ հիվանդության ժառանգականության գործոնը չկա, եթե չունի ճնշման խնդիր, ապա պետք է 50 տարեկանից սկսած պարբերաբար այցելել հետազոտման: Փոքր ժամանակվանից մարդ ունենալով շաքարախտ, պետք է ավելի հաճախ ստուգվի, որովհետեւ կաթվածը մահանալուց վատ է` մարդ միանգամից կորցնում է հասկանալու, խոսելու, շարժվելու ունակությունը»:
Թե սովորական քաղաքացին ինչպես պետք է հասկանա դիմացինի մոտ կաթվածի առկայությունը եւ որպես առաջին քայլ ինչ պետք է անել, նյարդաբան Միքայել Գրիգորյանն ասաց, որ կաթվածի նախանշաններն են` հանկարծակի թուլությունը, մարմնի որեւէ կողմից, քանի որ երկու կողմի միաժամանակ թուլությունը կաթված չէ. «Ուղեղի 2 կիսագնդերը չեն կարող կաթված տալ եւ եթե լինում էլ է նման դեպք, ապա շատ հազվադեպ: Հանկարծակի թուլություն դեմքի, ձեռքի, ոտքի վրա, եթե հանկարծակի չեք կարողանում խոսել կամ հասկանում մարդիկ ինչ են ձեզ ասում, կամ արտասանում եք չհասկացված կապակցություններ: Այս դեպքերում պետք չէ դանդաղել եւ մտածել, անմիջապես զանգահարեք շտապ օգնություն, քանի որ ինչքան շուտ հասցնեք հիվանդանոց, այնքան ավելի արդյունավետ կանցնի բուժումը:
Անուշ ՄԱԹԵՎՈՍՅԱՆ
