Սեպտեմբերի 18-ին Հայաստանում նշում են աստղագիտության օրը: Օրվա կապակցությամբ` «Ուրբաթ» մամուլի ակումբում, Բյուրականի աստղադիտարանի տնօրեն Հայկ Հարությունյանը խոսելով Վիկտոր Համբարձումյանի ավանդի եւ վերջին 20 տարիների ընթացքում աստղադիտարանի կրած կորուստների եւ ձեռքբերումների մասին՝ ասաց. «Վիկտոր Համբարձումյանը, անկասկած, 20-րդ դարի խոշորագույն գիտնականներից է: Այդ մասին են ասում օտարազգի այլ գիտնականներ: Եթե նա եղած չլիներ, Հայաստանում չէր լինի աստղագիտության այն լուրջ մակարդակը, որը կա այսօր»:
Հավելեց, որ Վ. Համբարձումյանն այն մեծ գիտնականներից է, որ և Խորհրդային միության, և Հայաստանի մեծ հայրենասեր էր, ինչը շատ հազվադեպ էր լինում: «Համբարձումյանին պետք է դիտարկել որպես մեծ գիտնական, քաղաքացի, հայրենասեր, պետական գործիչ»,- ասաց Հ. Հարությունյանը:
Ըստ Հայկ Հարությունյանի` վերջին քսան տարիների ընթացքում Հայաստանում աստղագիտությունը որոշակի կորուստներ է կրել և ֆինանսական միջոցների սղության, և գիտնականների արտահոսքի պատճառով, միաժամանակ ուրախությամբ հայտնելով, որ այժմ սկսվել են դիտակների արդիականացումը, ֆինանսավորում տրամադրել է նաև կառավարությունը:
Բյուրականի աստղադիտարանի տնօրենի փոխանցմամբ` այսօր աստղագիտության ոլորտը կադրերի խնդիր ունի. «ԵՊՀ-ի աստղաֆիզիկայի ֆակուլտետի մագիստրատուրան այս տարի առաջին կուրս չունի: Երկու հոգի էին ցանկանում ընդունվել մագիստրատուրա, սակայն երկու հոգու համար այդ կուրսը չէր բացվի»,-ընդգծեց նա` նշելով, որ այսօր Բյուրականի աստղադիտարանը միջազգային կապերը շարունակում է ընդլայնել:
Կարդացեք նաև
Նրա ներկայացրած տվյալներով, տարեկան 30 արտասահմանյան գործուղում են ունենում, որոնք կատարվում են հրավիրող կողմի միջոցներով: «Սա ցույց է տալիս, որ մեր գիտական ներուժը պահանջված է, արտասահմանցի գիտնականները ցանկություն ունեն աշխատել նրանց հետ»,-ասաց Հարությունյանը:
Քրիստինա ՄԻՐԶՈՅԱՆ
