«Դա Հայաստանի ղեկավարության որոշումն է, և մենք հարգում ենք հայկական կողմի որոշումը»,-Aravot.am-ի հարցին` ՀՀ-ի` Մաքսային միությանն անդամակցելու որոշումը արդյոք փակու՞մ է մեր հանրապետության առաջ Եվրոպայի դռները, այսպես պատասխանեց ՄԱԿ-ի հանրային տեղեկատվության վարչության հայաստանյան գրասենյակի ներկայացուցիչ Մարիա Դոցենկոն:
Նշենք, նա սկզբում հարցին ընդհանրական պատասխան տվեց` խուսափելով ըստ էության անդրադառնալ խնդրին. «Այսօր ՄԱԿ-ում մենք նշում ենք ժողովրդավարության և քաղաքացիական հասարակության օրը: Մեր նախաձեռնությունն է քաղաքացիական հասարակության և գործարար հատվածի միջև քննարկում կազմակերպելը: Մեր նպատակն այն է, որ լսելի լինի բոլորի ձայնը: Այդպիսով ընդգծվում է այն, թե որքան կարևոր է յուրաքանչյուրի կարծիքը Հայաստանի, ինչպես նաև ցանկացած այլ երկրի քաղաքական, տնտեսական և սոցիալական զարգացման համար»:
Այնուամենայնիվ կրկին հարցրինք `արդյոք Մաքսային միության անդամակցումը Եվրոպայի դռները ՀՀ-ի առաջ չի՞ փակում, Մարիա Դոցենկոն պատասխանեց. «Դա Հայաստանի ղեկավարության որոշումն է: Յուրաքանչյուր երկիր ինքն է որոշում իր զարգացման ուղին: Նորից վերադառնում ենք նույն մտքին, որ յուրաքանչյուր անձի կարծիքը կարևոր է: Ինչ վերաբերում է Ձեր հարցին, ապա այստեղ են գտնվում ԵՄ-ի ներկայացուցիչներ, գուցե նրանց հղեք այդ հարցը: Իսկ մենք կշարունակենք համագործակցել թե՛ Հայաստանի կառավարության , թե ՛ հասարակական, կրթական ոլորտի, թե՛ լրատվամիջոցների և թե՛ մեր գործընկերների հետ»:
Կարդացեք նաև
Տաթև ՀԱՐՈՒԹՅՈՒՆՅԱՆ
