Այսօր Քրեական վերաքննիչ դատարանում ՀԱԿ ակտիվիստների դատավարությունն ընթացավ մեկ այլ՝ ավելի ընդարձակ դահլիճում: Ներկաները Տիգրան Առաքելյանին դիմավորեցին բուռն ծափողջույններով եւ հոտնկայս՝ գոռալով՝ «Տիգ-րան, Տիգ-րան, Սեր-ժիկ, հե-ռա-ցիր»: Դահլիճում կանայք հույս հայտնեցին. «Գոնե այս դահլիճը խերով լինի քեզ համար, Տիգրան ջան»:
Դատական նիստի ընթացքում պաշտպան Մուշեղ Շուշանյանը նորից փորձեց հանդես գալ միջնորդությամբ՝ Տիգրան Առաքելյանի խափանման միջոցը փոխելու եւ նրան կալանքից ազատ արձակելու: Հիշեցնենք, որ երեք անգամ պաշտպաններն արդեն նման միջնորդություն ներկայացրել են եւ դատարանը մերժել էր:
Դատավոր Եվա Դարբինյանի խոսքերով՝ «Վկաներից մեկը չի հարցաքննվել: Փակ շրջան է ստացվում, դուք ամեն անգամ պարտավորվում եք վկային հաջորդ նիստին բերել ու չեք բերում, փակ շրջան է ստացվում: Եթե դատարանը չկարեւորեր այս հարցը, այսքան չէր հետաձգվի այս հարցը եւ այսքան չէր ընդառաջի: Ուրիշ բան չունենք անելու, դատարանը պետք է անցնի դատական վիճաբանությունների փուլին: Այդ ընթացքում Առաքելյանը շարունակում է մնալ կալանքի տակ: Ձեզանից ոչ ոք չգիտի, թե խորհրդակցական սենյակ երբ դատարանը գնա՝ ինչ որոշում կլինի: Անիմաստ տեղը ձգձգվում է դատական ընթացքը»:
Դատավորը խորհուրդ տվեց 10 րոպե ընդմիջման ժամանակ պաշտպանն իր պաշտպանյալների հետ ճշգրտի հետագա մարտավարությունը, որովհետեւ այդ վկային ոչ մի կերպ չեն գտնում:
Կարդացեք նաև
Ընդմիջումից հետո պաշտպանը հայտարարեց, որ վկայի՝ Մոդոյանի բնակության վայրն այս պահին ճշտելու հնարավորություն չունեն, ուստի այդ վկային կանչելու միջնորդությունը հանում են:
Հռիփսիմե ՋԵԲԵՋՅԱՆ
