17 սեպտեմբերի, 2013, Երևան – ԵՄ ավտոբուսի երկրորդ շրջայցը կմեկնարկի չորեքշաբթի` սեպտեմբերի 18-ին: Այս անգամ ԵՄ ավտոբուսը կլինի Գեղարքունիքի և Արարատի մարզերի գյուղերում ու քաղաքներում: ԵՄ ավտոբուսի շրջայցը կազմակերպում է ԵՄ կենտրոնը Երևանում:
Հայաստանում ԵՄ պատվիրակության ղեկավար, դեսպան Տրայան Հրիսթեան նշեց, որ ԵՄ ավտոբուսի շրջայցերն ավանդական են դառնում: «Մի քանի ամիսների ընթացքում արդեն երկրորդ անգամ է, ինչ մեր ԵՄ շարժական կենտրոնը այցելում է Հայաստանի մարզեր», նշեց դեսպանը: «Մենք ցանկանում ենք ողջ երկրով մեկ մարդկանց տեղեկացնել Հայաստանում ԵՄ համագործակցության և մեր աջակցության արդյունքների մասին»:
ԵՄ ավտոբուսը սեպտեմբերի 18-20-ը կլինի Գեղարքունիքի մարզի Սևան, Ճամբարակ, Վարդենիս, Մարտունի և Գավառ քաղաքներում ու շրջակա գյուղերում:
ԵՄ պատվիրակության քաղաքական, տնտեսական, մամուլի և տեղեկատվության բաժնի ղեկավար Դիրկ Լորենցը ուրբաթ` սեպտեմբերի 20-ին պաշտոնապես կբացի հայկական ավագ դպրոցների համար նախատեսված ԵՄ դասընթացը Վարդենիկի թիվ 3 ավագ դպրոցում: Դասընթացը մշակվել է ԵՄ կենտրոնի կողմից Կրթության և գիտության նախարարության հետ համագործակցությամբ` երիտասարդության շրջանում ԵՄ-Հայաստան համագործակցության մասին գիտելիքն ու ըմբռնումը ընդլայնելու նպատակով:
Նույն օրն ավելի վաղ պրն Լորենցը նաև ԵՄ-Հայաստան հարաբերությունների մասին դասախոսություն կկարդա Գավառի պետական համալսարանում:
ԵՄ ավտոբուսը սեպտեմբերի 23-ին և 24-ին իր շրջայցը կշարունակի Արարատի մարզի Վեդի, Արարատ և Արտաշատ քաղաքներում ու շրջակա գյուղերում: Սեպտեմբերի 24-ին դեսպան Տրայան Հրիսթեան դասախոսություն կկարդա Վեդիի մշակույթի տանը:
ԵՄ ավտոբուսը առաջարկում է ավելին սովորել Եվրոպական միության մասին տեղեկատվական նյութերի, ծրագրերի ներկայացումների, հարցաշարերի, Թատրոնի և կինոյի պետական ինստիտուտի ուսանողների բեմադրությամբ խաղերի միջոցով: Ցանկացած մարդ կարող է մասնակցել վիճակախաղին և արժանանալ գրավիչ մրցանակների: ԵՄ ավտոբուսի առաջին շրջայցն այս տարվա մայիսին էր, երբ ԵՄ ավտոբուսը այցելեց Շիրակի, Լոռու և Տավուշի մարզերի գյուղեր ու քաղաքներ:
ԵՄ Կենտրոնը ԵՄ կողմից ֆինանսավորվող «Աջակցություն ԵՄ հաղորդակցությանը` Հայաստանում բարեփոխումների վերաբերյալ» ծրագրի հիմնական բաղկացուցիչն է։ Կենտրոնի նպատակն է բարձրացնել իրազեկությունը Հայաստանում ԵՄ զարգացման համագործակցության մասին և աջակցել ԵՄ մասին կրթությանը: Կենտրոնի կայքէջը Հայաստանի հետ ԵՄ-ի համագործակցության հիմնական հարթակն է։ Ծրագրի տևողությունը 2 տարի է:
