ԵՊՀ-ում ուսանողների եւ դասախոսների հետ այսօր հանդիպման ժամանակ ՀՀ պաշտպանության նախարար Սեյրան Օհանյանը, պատասխանելով ԵՊՀ դասախոսներից մեկի հարցին, անդրադարձավ մեկ ամիս առաջ Ադրբեջանում գերեվարված հայ զինվորի ճակատագրին:
Նախարարն ասաց. «Հակոբ Ինջիղուլյանը գիշերը մոլորվել եւ անցել է Ադրբեջանի սահմանը: Մենք հիմա ամեն ինչ անում ենք նրան վերադարձնելու համար եւ հիմնական խոչընդոտը, որի պատճառով չենք կարողանում մինչեւ այժմ՝ ետ բերել, դա երկու երկրների միջեւ պետական կապի բացակայությունն է: Բանակցություններն արվում են միջազգային կառույցների միջոցով: Եվ ընթացքը մի քիչ դանդաղ է եղել, քանի որ Ադրբեջանի «Կարմիր խաչի» ներկայացուցիչները չեն կարողացել հանդիպել Հակոբին: Բայց դրանից հետո նամակագրությունն իրականացվել է, բանակցություններն ընթանում են, եւ ամեն ինչ անում ենք, որ նա վերադառնա: Թե ինչ վիճակում կվերադառնա՝ չգիտեմ: Իհարկե, Ադրբեջանի ղեկավարությունն ասում է, որ Հակոբը ուզում է գնալ երրորդ երկիր, բայց ես ասել եմ եւ միշտ կասեմ, որ Հակոբի նկատմամբ որեւէ հետապնդում չի լինի, որովհետեւ նա մոլորված է անցել սահմանը: Եվ երբեք մենք մոլորված Ադրբեջան գնացածների հանդեպ ոչ մի հետապնդում չենք իրականացրել:
Ես չէի ցանկանա, որ երբեւիցե որեւէ մեկը լիներ նրա տեղը: Ես պատկերացնում եմ, թե այնտեղ ինչպիսի ճնշումների է նա ենթարկվում, եւ ինչպիսի ճնշումների արդյունքում է նա ադրբեջանական հեռուստատեսությամբ ասել այդ քննադատական խոսքերը մեր բանակի մասին: Նրա ծնողներն էլ ասում են, որ երբեք ոչ մի դժգոհություն չեն լսել որդուց»:
Մելանյա ԲԱՐՍԵՂՅԱՆ
