Այսօր «Հայացք» ակումբում ՀԱԿ խմբակցության պատգամավոր, նախկին վարչապետ Հրանտ Բագրատյանն անդրադարձավ իր դեմ ներկայացված դատական հայցին՝ գրագողության համար:
Նա հայտարարեց, որ դա քաղաքական բացահայտ պատվեր է եւ նորից վարչապետն է դրա հետեւում կանգնած. «Դուք գիտեք, որ երբ եղա վարչապետ, առաջին գործը գիտության թեմատիկ ֆինանսավորման անցնելն էր: 95-ին Լեւոն Տեր-Պետրոսյանը ակադեմիան պաշտպանեց: Ես ասում էի՝ 13 հազար աշխատողից կմնա 3-4 հազար նորմալ վարձատրվող, հիմա հազարն էլ չի մնացել: 2008-ի դեկտեմբերին Լեւոն Տեր-Պետրոսյանը ինձ խնդրեց գրել ՀԱԿ-ի համար ծրագիր, ես գրեցի, այն լույս տեսավ՝ որպես 100 քայլ: 84-րդ կետը վերաբերում էր գիտությանը, որ պետք է լինի թեմատիկ ֆինանսավորում: Կրթություն է գրվել, գյուղատնտեսություն, գիտություն: Գիտությունն ամենածանրը եղավ: Հետո պարզվեց, որ ապրիլին մի կին՝ Մանե Հակոբյան անունով, լսել էր ինչ ենք խոսում, իրիկունը տանում-գրանցում է մարդը: Գրած-պատրաստ էր, այդտեղ ընդհանրապես հեղինակային իրավունքի հարց լինել չի կարող»:
Գիտության ֆինանսավորման մասին հատվածը ֆեյսբուքյան էջում է դրվում, որը տեսնելով՝ Մանե Հակոբյանը դատի է տալիս այն անձանց, ովքեր ստորագրել են դրա տակ՝ Հարություն Կարապետյան, Հրանտ Բագրատյան:
Պարոն Բագրատյանը նաեւ հայտարարեց, որ փորձաքննության հետեւում պարզել է, թե ովքեր են կանգնած՝ ՀՀ վարչապետ Տիգրան Սարգսյանը, նախկին վարչապետ Վազգեն Մանուկյանը եւ արդարադատության փոխնախարար Արամ Օրբելյանը:
Կարդացեք նաև
Հրանտ Բագրատյանի խոսքերով՝ «Առաջին անգամ մազութի գործն էր, Արշակ Սադոյանն ասեց՝ ինչ ասել ենք՝ փոխաբերական իմաստով ենք ասել, փակվեց գործը: Երկրորդ անգամ Տիգրան Սարգսյանի հետ եմ դատվել՝ Արդշինբանկի հետ կապված: Երրորդը սա է: Հանգիստ եղեք, ես էլի կհաղթեմ, բայց սրա հետեւը կանգնած է էլի վարչապետական թիմը»:
Հռիփսիմե ՋԵԲԵՋՅԱՆ
