Երեկ Ազգային անվտանգության ծառայությունից տեղեկացանք, որ քաղաքագետ, քաղաքական գործիչ եւ գործարար Արկադի Վարդանյանի
գործով նախաքննությունն ավարտված է, եւ օգոստոսի 29-ին գործն ուղարկվել է Կենտրոն եւ Նորք-Մարաշ վարչական շրջանների դատարան։
Արկադի Վարդանյանը ձերբակալվել էր մայիսի 18-ին, իր ընկերոջ՝ Արսեն Ավետյանի հետ։ Երկուսին էլ կասկածում էին Արսեն Ավետյանի հոր՝ Ռոբերտ Ավետյանին թունավորելու փորձ կատարելու մեջ։
Այդ օրերին քննչական շրջանակից չճշտված լուր սպրդեց, թե Արկադի Վարդանյանն ու Արսեն Ավետյանը գումարի կարիք ունեին եւ, իբր, փորձել էին համոզել Արսեն Ավետյանի տարեց հորը՝ վաճառել իր երեւանյան բնակարանը եւ վաճառքից գոյացած միջոցներն իրենց տալ, բիզնես նպատակներով օգտագործելու համար։ Սակայն Արսենի հայրը չի համաձայնել եւ կասկածելով, որ որդին ու նրա ընկերը փորձել են իրեն թունավորել, հայտնել է այս մասին «ուր պետք է»։ Այս տեղեկությունները պաշտոնական հաստատում չստացան, իսկ վարույթն իրականացնող մարմինը՝ ԱԱԾ քննչական վարչությունը, թեեւ խոստացել էր իրազեկել հանրությանը հետաքրքրող եւ քաղաքական հնարավոր կոնտեքստ ունեցող ու շահարկման մեծ հնարավորություն ընձեռող այս քրեական գործի քննության վերաբերյալ, հետագայում, սակայն, ոչ մի տեղեկություն չհրապարակեց, բացի մեկից՝ որ Արկադի Վարդանյանին մեղադրանք է առաջադրված Քրօր. 35-104 հոդվածներով՝ մի խումբ անձանց կողմից շահադիտական դրդումներով սպանության նախապատրաստության համար։
Կարդացեք նաև
Այս մեղադրանքը Վարդանյանն առայսօր չի ընդունել։ Այս մասին մեզ հայտնեց նրա փաստաբան Գայանե Գալոյանը։ «Կարծում ենք, որ մեղադրանքը ճիշտ չէ։ Ըստ մեղադրանքի, Ավետյանը ցանկացել է իր հորը թունավորման ճանապարհով սպանել, բայց հայրը բողոք չունի։ Նա սկզբում ներկայացել է բողոքով, բայց հետո ասել է, որ չի հավատում, որ իր տղան նման բան կաներ»,- ասում է Գայանե Գալոյանը:
Սյուզան ՍԻՄՈՆՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
