«Ուշադրություն դարձրեք ավագ դպրոցից դուրս եկող երեխաներին, դուրս են գալիս ու թռնում են մոտակա կանգնած «Ջիպը»: Չեն քայլում, սպորտով չեն զբաղվում, ֆիզիկական թերակտիվություն է նրանց մոտ»,-այսօր «Նոյյան տապան» լրատվական կենտրոնում ասաց «Արաբկիր» բժշկական համալիր–Երեխաների եւ դեռահասների առողջության ինստիտուտի ղեկավար Սերգեյ Սարգսյանը:
Նրա խոսքերով, երեխաների ֆիզիկական խնդիրներով մեզնից հետ է Թուրքիան:
Ըստ պարոն Սարգսյանի, Առողջապահության համաշխարհային կազմակերպությունը ուսումնասիրել է եւ պարզել, որ մեծահասակների հիվանդացությունը եւ վաղ մահացությունները կախված են դեռահասային տարիքում ձեւավորված սովորություններից, ապրելակերպից:
Սերգեյ Սարգսյանի տվյալներով, ֆիզիկական եւ հոգեկան առողջության խնդիրները տարածված են ողջ աշխարհում, սակայն Հայաստանում մասնավորապես` տարածված են շնչառական առողջության, աղեստամոքսային խնդիրները, դեպրեսիաները եւ այլն:
«Հայաստանը ծխելու ռեկորդակիր է: Բացի այդ, մեր դպրոցականները շատ ժամանակ են անցկացնում համակարգչի, հեռախոսի հետ»,-ասում է պարոն Սարգսյանը` նկատելով, որ մեր դեռահասության տարիքի տղաները, ի տարբերություն այլ ազգերի տղաների, շատ հաճախ են ձեռնամարտի բռնվում:
Կարդացեք նաև
Հեռուստացույց նայելով էլ ռեկորդակիր են դեռահաս հայ աղջիկները, ինչը մասնագետի խոսքերով՝ նպաստում է ֆիզիկապես թերակտիվ լինելուն: Փոխարենը Հայաստանը դրական ցուցանիշներ է արձանագրել պսիխոակտիվ նյութերի կիրառմամբ:
Ըստ որոշ հետազոտությունների, մեր երկրում, ի տարբերություն այլ երկրների, երեխաները ավելի շատ են սիրում դպրոցը: Դեռահաս երեխայի երջանիկ լինել-չլինելու նախապայման է լիարժեք ընտանիքում մեծանալը, դպրոց գնալը, սիրելը-չսիրելն ու երեխայի ընկեր ունենալ-չունենալը:
Լուսինե ԲՈՒԴԱՂՅԱՆ
