«Ընդդեմ իրավական կամայականության» հ/կ-ի Մեղրիի մասնաճյուղը հունիս ամսից իրականացնում է «Կանաչ աղջիկներ. Առաջնորդություն եւ շրջակա միջավայրի պահպանություն» խորագրով ծրագիր, որի նպատակը 13-15 տարեկան աղջիկների մոտ ժողովրդավարական եւ ակտիվ քաղաքացիական դիրքորոշում ունեցող քաղաքացիների աշխարհայացքի ձեւավորումն է եւ բնապահպանական խնդիրների հանդեպ ուշադրությունը: Ծրագիրը կավարտվի հաջորդ տարվա փետրվարին:
Ծրագրի ղեկավար Ռուզաննա Սարգսյանը նշեց, որ ծրագրի շահառուները ընտրվել են Ագարակ ու Մեղրի քաղաքային համայնքների դպրոցներից՝ աղջիկների լրացրած դիմում-հայտերի հիման վրա: Ընտրվել է 20-25 մասնակից: Աղջիկները կմասնակցեն «Հաղորդակցման եւ շփման տեսակները», «Կինը եւ գենդերային խնդիրները», «Կին-առաջնորդը եւ նրա դերը հասարակության մեջ», «Թիմ եւ թիմային աշխատանք» դասընթացներին: Տիկին Սարգսյանի խոսքով, շրջակա միջավայրի մաքրությունն այսօր գլոբալ համաշխարհային խնդիր է, որը սպառնում է մարդու եւ կենդանական եւ բուսական աշխարհի գոյությանը. «Էկոլոգիական մշակույթը պետք է սկսվի յուրաքանչյուրիս տնից եւ դառնա երեխաների դաստիարակման նոր հայեցակարգ»:
Ի դեպ, ծրագրի ընթացքում Մեղրի քաղաքի բնակիչներին սպասվում է անակնկալ` աղջիկները քաղաքին կնվիրեն «երկրորդ կյանք» ստացած կենցաղային կոշտ թափոններից պատրաստված իրեր:
Սեփ. լր.
Կարդացեք նաև
«Առավոտ» օրաթերթ
