Սեպտեմբերի 13-ին լրագրողների հետ հանդիպման ընթացքում Հայաստանի փոխադրող կազմակերպությունների միության համանախագահ Վարդան Փանոսյանի արած հայտարարությունը, թե փոխադրող կազմակերպությունների միությունը պատրաստ է միանալ քաղաքապետարանի դիմաց բողոքի ցույց անող ակտիվիստներին, «Առավոտի» հետ զրույցում մեկնաբանեց «Ավտովարորդների պաշտպանության լիգայի» նախագահ Տիգրան Հովհաննիսյանը.
«Քաղաքապետարանը ուզում է ներգրավի նախագահ Հրանտ Եղիազարյանին, որը ոչ մի հայտարարություն չի անում, պետական ռեգիստրում գրանցված չէ, ոչ էլ ժողովի արձանագրություններում էլ կա: Ինքը պրն Նավասարդյանի մարդն է, իսկ Նավասարդյանը, Փանոսյանի հայտարարությամբ, հրահրեց ժողովրդին գծի տերերի նկատմամբ, ինքը հայտարարեց 150 դրամ, ընդհատակ գնաց և փոխադրողների դեմ հանեց ժողովրդին: Ուստի պրն Փանոսյանը հայտարարեց, որ պատրաստ է միանալ ակտիվիստներին, որովհետև ամեն ինչի հրահրողը Հենրիկ Նավասարդյանն է»:
Տիգրան Հովհաննիսյանի խոսքերով, հանդիպումներ են տեղի ունենում ակտիվիստների, ազատամարտիկների հետ, որոնց ներկայացնում են իրենց ծրագրերը.
«Մենք ուզում ենք մեր ծրագրերն ու առաջարկները իրենց ներկայացնել, որպեսզի իրենք ավելի հստակ պատկերացնեն, որ Հենրիկ Նավասարդյանի հրաժարականը պահանջում ենք ոչ միայն ինչ-որ հայհոյանքի համար, այլ նաև որպես մասնագետ, որպես պառակտող ուժ, որպես բացասական երևույթ: Իրենք էլ հոյակապ են ընդունում ծրագիրը»:
Տիգրան Հովհաննիսյանը նշեց, որ որպես պայքարի միջոց օգտագործվելու է իրենց ծրագիրը, որը պետք է լուծի մի շարք խնդիրներ և միավորի «գծի տերերին», փոխադրող կազմակերպություններում աշխատող վարորդներին, տաքսու վարորդներին:
Նրա խոսքերով, պայքարի ընթացքում պատրաստ են միավորվել ազատամարտիկների, ակտիվիստների և բոլոր նրանց հետ, ովքեր ուզում են կյանքը փոխել:
Ծրագիրը ներկայացվել է ՀՀ նախագահ Սերժ Սարգսյանին, վարչապետ Տիգրան Սարգսյանին և քաղաքապետ Տարոն Մարգարյանին: Ծրագրի շրջանակներում ստեղծվելու է վարորդների արհմիություն և բարձրացվելու է սպասարկման որակը:
Ամի ՉՒՉԱԿՅԱՆ
