«Մայիսին հայ-ռուսական միջխորհրդարանական հանձնաժողովն իր օրակարգում այդ հարցն ունեցել է Մոսկվա կատարած այցի ժամանակ` Պետդումայում: Զեկուցողներ են նշանակվել երկու կողմերից, հարցերն ուսումնասիրվել են, քննարկվել են, վերադառնալուց հետո մամուլի ասուլիս է եղել, հարցազրույցներ: Ես հատուկ ուզում եմ նշել, որ հայկական կողմից համազեկուցողն էր տնտեսագիտության դոկտոր Աշոտ Թավադյանը, ով շատ լուրջ, բազմակողմանի տնտեսական վերլուծություններով էր ներկայացել» ,- օրերս «Առավոտի» հետ զրույցում ասել էր ԱԺ փոխնախագահ Հերմինե Նաղդալյանը`նաեւ այսպես հիմնավորելով այն, որ Մաքսային միությանն անդամակցելու որոշումը Սերժ Սարգսյանն անակնկալ եւ միանձնյա չի կայացրել, որ այդ թեմայով հանդիպումներ ու քննարկումներ բազմիցս են եղել:
ԲՀԿ խմբակցության պատգամավոր Տիգրան Ուրիխանյանից, որը նույնպես հայ-ռուսական միջխորհրդարանական հանձնաժողովի անդամ է, Aravot.am-ը հետաքրքրվեց այդ հանդիպումների եւ քննարկումների ժամանակ խոսք եղե՞լ է Մաքսային միությանն անդամակցության մասին, կամ քննարկումների ընթացքից ինքը տպավորություն ստացե՞լ է, որ հայկական կողմը քննարկում է նաեւ Մաքսային միությանն անդամակցության հնարավորությունները: «Այդ քննարկումներին մասնակցել եմ, ավելին, չծրագրավորված եւ բավականին բովանդակային ելույթ եմ ունեցել`բազմաթիվ հարցադրումներով, որոնք վերաբերում են էլեկտրաէներգիայի արտահանման հնարավորություններին, շուրջ 170 հազար կիլոմետր ընդհանուր միության գոտում, Աբխազական երկաթգծի վերաբացման, մաքսային լրացուցիչ արտոնությունների` հաշվի առնելով ընդհանուր սահմանի բացակայությունը, ԼՂՀ հարցի առնչությամբ`այս նոր տնտեսական միության գործունեության պարագայում եւ այլն: Բոլոր օրինակները եւ ձեւակերպումները բերել եմ պատմականորեն ձեւավորված բարեկամության եւ ռազմավարական համագործակցության համատեքստում»,- ասաց Տիգրան Ուրիխանյանը` հավելելով. «Մաքսային միությանն անդամակցության հնարավորությունների մասին որեւէ վերջնական դիրքորոշում հայաստանյան կողմից որեւէ մեկը չի հայտնել, այդ թվում պատվիրակության ղեկավարը»:
Նելլի ԳՐԻԳՈՐՅԱՆ
