Այսօր ԱԺ ՀՀԿ-ական պատգամավոր Սամվել Ալեքսանյանի պաշտպանները կրկին հավաքվել էին Փակ շուկայի մոտ: Նրանք ժամեր առաջ հավաքվել ու սպասում էին «Ազատագրենք հուշարձանն օլիգարխից» հասարակական շարժման անդամներին: Պատգամավորի կողմնակիցները ակտիվիստներին դիմավորեցին կրկին նույն կոչերով՝ «Ալեքսանյան բարերար», «Ալեքսանյան շինարար», «Հեռացեք» եւ «Ո՛չ գրանտակերներին» պաստառներով ու դրոշներով, սուլոց-աղաղակով:
Փակ շուկայի նորոգման ու նոր տեսքով գործելու կողմնակիցներն ու ակտիվիստները կանգնել էին հանդիպակաց փողոցներում: Այս անգամ նրանց միջեւ բախում չեղավ, իրենց ասելիքը փողոցից փողոց էին ուղարկում բարձրախոսներով:
Կարդացեք նաև
«Շուկան չի կարող բացվել այն տեսքով, որ հիմա գոյություն ունի: Քանի որ ապօրինի կառույցը պաշտոնական բացում չի կարող ապահովել»,- հայտարարում էին ակտիվիստները: Զուգահեռ փողոցից Ալեքսանյանի պաշտպանները սուլում էին եւ պահանջում հեռանալ: Իսկ ակտիվիստները նրանց հեգնում էին՝ ոնց որ երգչախումբ լինի:
Սամվել Ալեքսանյանի պաշտպանների հետ Փակ շուկա էր այսօր եկել նաեւ գարնանը Աժ ընտրություններին թիվ 8/8 աղմկահարույց տեղամասում Ալեքսանյանի վստահված անձը՝ Էդոն: Այսօր նա «դիրիժորությամբ» էր զբաղված եւ հավաքվածներին հորդորում էր՝ երբ խոսեն, ինչքան խոսեն ու ինչ խոսեն:
Արփինե ՍԻՄՈՆՅԱՆ
