Այսօր Գյումրու Ջորջ Բայրոնի անվան թիվ 20 անգլիական դպրոցի ջեռուցման համակարգը շահագործելու նպատակով Գյումրիում էին ՀՀ-ում ՄԵծ Բրիտանիայի դեսպաններ Ջոնաթան Էյվսը և Քեթի Լիչը: Նշենք, որ էլիտար համարվող այս դպրոցը կառուցվել է երկրաշարժից անմիջապես հետո Մեծ Բրիտանիայի կառավարության և ժողովրդի աջակցությամբ ու պաշտոնապես բացվել է հենց այս երկրի վարչապետ Մարգարետ Թետչերի մասնակցությամբ:
Ինչևէ, քանի որ դպրոցը ջեռուցման համակարգ չուներ, Երևանում «Թեքեյան կենտրոն» հիմնադրամը Բիտանիայի դեսպանության, ինչպես նաև Հայաստանի ու Սփյուռքի բազմաթիվ բարերարների օժանդակությամբ իրականացրեց Ջորջ Բայրոնի անունը կրող դպրոցի «Ջեռուցման համակարգ և գազաֆիկացում» ծրագիրը: Այս ծրագրի արժեքը կազմել է 25 հազար ֆունթ ստեռլինգ, սակայն հաջողվել է մի քիչ ավել գումար հավաքել:
Լրագրողները Ջոնաթան Էյվսից կարծիք հարցրեցին Հայաստանի՝ Մաքսային միությանը անդամակցելու շուրջ, որին դիվանագետը պատասխանեց. «Մենք ընդգծել ենք այն հանգամանքը, որ Հայաստանը ինքը պետք է իր որոշումը կայացնի, թե ինչպես կառուցի իր ապագան, կոնկրետ Մեծ Բրիտանիան շատ է ցանկանում, որ Հայաստանը շարունակի իր համագործակցությունը Եվրոպայի հետ, բայց նաև ցանկանում է, որ ունենա լավ հարաբերություններ Ռուսաստանի հետ»:
Իսկ մի՞թե հնարավոր է համագործակցել թե Եվրամիության, թե Մաքսային միության հետ, դիվանագետն ասաց, որ բոլոր կողմերը շահագրգռված են, որ համագործակցությունը Եվրոպայի հետ շարունակվի: Դեսպանը նաև տեղեկացրեց, որ Եվրամիության դեսպանները, անցած չորեքշաբթի հանդիպելով Սերժ Սարգսյանի հետ, անչափ ուրախացել են` լսելով, որ ՀՀ-ն պատրաստ է իր համագործակցությունը շարունակել Եվրամիության հետ: Քննարկվել է այն հարցը, թե ինչպես է հնարավոր զարգացնել Հայաստան-Եվրոպա հարաբերությունները:
Կարդացեք նաև
Ի դեպ, պարոն դեսպանը ջեռուցման համակարգի մասին խոսելիս ելույթ ունեցավ հայերեն:
Նունե ԱՐԵՎՇԱՏՅԱՆ
