Դիլիջանի քաղաքային գրադարանի աշխատակից, Շահումյան փողոցի 8-րդ շենքի 2-րդ հարկի բնակչուհի Սիրամարգ Մանուկյանը բազմաթիվ ատյաններ է դիմել նույն շենքի առաջին հարկի հարեւան Վարդան Սարիբեկյանի կողմից շենքի հարակից տարածքում կառուցված օբյեկտի դեմ:
Դիլիջանի քաղաքապետի 2007թ. օգոստոսի 3-ի որոշմամբ Վ. Սարիբեկյանին վերոհիշյալ շենքի հարակից տարածքում, կառուցապատման նպատակով հատկացվել է 20 քառակուսի մետր հողամաս՝ առեւտրի սրահ կառուցելու նպատակով: 2012թ. դեկտեմբերի 10-ին Դիլիջանի քաղաքապետի կողմից տրվել է ճարտարապետահատակագծային առաջադրանք, որի հիման վրա մշակվել է նախագիծ, 2012թ. դեկտեմբերի 25-ին՝ տրվել շինթույլտվություն: Ս. Մանուկյանը դիմել է Դիլիջանի քաղաքապետարան, քաղաքաշինության նախարարին, ՀՀ նախագահին, բողոքելով, որ կառուցվող սրահի երկրորդ հարկը փակում է իր բնակարանի լուսավորությունը եւ տեսադաշտը: ՀՀ քաղաքաշինական պետական գլխավոր տեսուչ Ս. Հայրապետյանը ՀՀ քաղաքաշինության նախարարության «թեժ գծին» Ս. Մանուկյանի ահազանգի կապակցությամբ 2013թ. ապրիլի 18-ին Մանուկյանին գրավոր հայտնել է. « Հարեւան բազմաբնակարան շենքի բնակարանների բնական ինսոլյացիայի պահպանման պահանջներից ելնելով՝ նախագծով ներկայացված +7.260 առավելագույն բարձրությունն իջեցվել է +6.560 նիշի եւ նշված փոփոխությունը համաձայնեցվել է Դիլիջանի քաղաքապետի կողմից»:
2013թ. սեպտեմբերի 9-ին Դիլիջանի քաղաքապետ Արմեն Սանթրոսյանին ուղարկած դիմումի մեջ Ս. Մանուկյանը հայտնել է . «Ձեր կողմից իմ ներկայությամբ հանձնարարական է եղել հնարավորին չափով իջեցնել, որպեսզի չխանգարի: Ճարտարապետն իմ ներկայությամբ հանձնարարում է իջեցնել մեկ շարք եւ անմիջապես իջեցվում է, իսկ հաջորդ օրը նկատում եմ, որ նորից բարձրացվում է (իսկական ներկայացում):
Կարդացեք նաև
Սիրամարգ Մանուկյանը խնդիրը լուսաբանելու խնդրանքով դիմել է՝ «Առավոտի» թղթակցին: Եղանք նշված վայրում, առեւտրի օբյեկտի տանիքն արդեն դրված էր: Ս. Մարգարյանի պատի տակ, բակում թափված էին Վարդան Սարիբեկյանին պատկանող զանազան շինանյութեր: Առեւտրի սրահի շինարարությունը ղեկավարող Վ. Սարիբեկյանը մեզ ասաց, որ ինքն օրինական է գործում, որ բոլոր հարցերով պետք է դիմել Դիլիջանի քաղաքապետարանի քաղաքաշինության եւ հողօգտագործման բաժնի պետ Նվեր Դանիելյանին: Ս. Մանուկյանի հետ այցելեցինք քաղաքապետարանի պաշտոնյային: Վերջինս ասաց, որ տեսադաշտի վերաբերյալ քաղաքաշինական նորմ չկա: Նրա խոսքերով, կառուցվող նոր օբյեկտները նաեւ աշխատատեղի, զբաղվածության հարց են լուծում, որ դրանց տեսքը ներդաշնակ է քաղաքի ճարտարապետական դիմագծին: Ս. Մանուկյանի բնակարանի բնական ինսոլյացիայի (արեւի ճառագայթների ներթափանցում) մասին Ն. Դանիելյանն ասաց, որ քաղաքաշինության տեսչության աշխատակիցների եզրակացությունից հետո կառույցի բարձրությունը 70 սմ-ով իջեցվել է: Նրան հարցրինք՝ արդյո՞ք իջեցվել է: Ն. Դանիելյանն ասաց, որ Վարդան Սարիբեկյանը զգուշացվել է,որ իջեցնի, ինքը հավատում է, որ այդ գործն արվել է: Բաժնի պետին հարցրեցինք, թե ինչո՞ւ ինքը տեղում չի ստուգում, չափում:
«Ես գնամ շլա՞նգ պահեմ, դրա համար գեոդեզիական գործիք է պետք»,- արձագանքեց Նվեր Դանիելյանը: Սիրամարգ Մանուկյանն ասաց, որ առեւտրի սրահի թեք տանիքը պակասեցնում է իր բնակարանի լուսավորությունը: Ն. Դանիելյանն ասաց, որ առանց թեք տանիքի կառույցը անշուք, նկուղանման տեսք կունենար: Դանիելյանը հայտարարեց, որ Սիրամարգ Մանուկյանը կարող է իր ֆինանսական միջոցներով փորձագետներ հրավիրել, եւ եթե փորձագիտական եզրակացությամբ ապացուցվի Վարդան Սարիբեկյանի կողմից քաղաքաշինական նորմերի խախտումները, իրենք պարտավորվում են այդ խախտումները վերացնել:
Ոսկան ՍԱՐԳՍՅԱՆ
