Այսօր Դալմայի այգիների արդեն նախկին հողօգտագործողները կառավարության շենքի մոտ բողոքի ակցիա էին անում: Թեեւ նրանք ընդամենը 4-5 հոգի էին, բայց ինչպես ցուցարարներն ասացին` կարեւորը քանակը չէ:
Ակցիայի մասնակիցները ամեն ուրբաթ առավոտյան ՀՀ նախագահի նստավայրի մոտ են ցույց անում, իսկ այսօր, իմանալով, որ նիստ է լինելու, մի մասը եկել էր կառավարության մոտ:
Aravot.am-ի հետ զրույցում Հայկ Հովհաննիսյանն ասաց, որ արդեն երկար ժամանակ է իրենց անընդհատ խոստանում են որեւէ փոխհատուցում տրամադրել, սակայն ինքը` որպես օրինական հողօգտագործող, իր բնակարանին մոտ տարածքում է ուզում նույն քմ-ով հողատարածք. «Ես պայմանագիր եմ ունեցել, օրինական գրանցված հողօգտագործող եմ եղել, հիմա պահանջում եմ իմ տանը մոտիկ տեղում` Աջափնյակում կամ Դավիթաշենում իմ ունեցած 800 մետրին համարժեք հող տան: Հիմա հողային փոխհատուցումը մերժում են, իսկ գումարայինն էլ ասում են` սպասեք, ինվեստորի հետ կառավարությունը բանակցում է, կգնաք իրանցից կստանաք: Բայց ինձանից քաղաքապետարանն է վերցրել հողը, թող քաղաքապետարանն էլ էդ հարցը լուծի, ոչ թե ես գնամ ինվեստորի հետեւից ընկնեմ»:
Մոտ 20 տարի Դալմայի այգիներում հող մշակելով, բերք ստանալով, բազմաթիվ ընտանիքներ եկամուտ են ստացել, իսկ այդ հողերը որպես պետական գերակա շահ օտարելուց հետո, ու ոմանց փոխհատուցում չտալով, ոմանց էլ չնչին գումարներ տալով, ինչպես ասացին ցուցարարները, պտղատու այգիները պետությունը վերացրեց, իրենց էլ զրկեցին եկամտի աղբյուրից:
Aravot.am-ի հետ զրույցում ցուցարարներից մեկի` Սարգիս Գրիգորյանի խոսքերով էլ` «Ես 15 տարի մշակել եմ պտղատու ծառերով այգին, մի մասը վերցրին ձեռիցս, քառակուսի մետրի դիմաց 2 դոլար տվին, էդ փողով տղես մի հատ մաշված «Ժիգուլի» առավ: Հիմա էլ ունեցած հողս կիսել են, մի մասը տվել եսիմ ինչ կազմակերպության, էն մի մասն էլ ես իմ ինչ պիտի անեն: Էդքան մշակել ենք, 20 տարի գոմաղբ ենք լցրել, փորել, բերք ստացել, հիմա ջուր չկա, խոտ ենք հնձում»:
Նելլի ԲԱԲԱՅԱՆ
