«Մինչև նման քաղաքական որոշում կայացնելը, պետք է հիմնական քաղաքական ուժերի հետ կոնսուլտացիաներ անցկացվեին»,- այսօր խորհրդարանական ճեպազրույցների ժամանակ ԲՀԿ-ի տեսակետը` Հայաստանի` Մաքսային միությանն անդամակցելու մասին, վերստին բարձրաձայնեց խմբակցության քարտուղար Նաիրա Զոհրաբյանը։ «Պետք չէ Սահմանադրությունից մեջբերումներ անել ու մեզ ասել, որ դա ՀՀ նախագահի բացարձակ մենաշնորհն է»,- ասաց տիկին Զոհրաբյանը։
Հիշեցնենք, որ նման հղումներով անցած քառօրյայի ընթացքում հանդես էր գալիս հիմնականում ԱԺ նախագահ Հովիկ Աբրահամյանը: ԱԺ-ում այդ հարցի քննարկումները Զոհրաբյանն առ ոչինչ է համարում, քանի որ մեծամասնությունը, եթե հրահանգված է, «կողմ» է քվեարկելու։ «Մաքսային միության փաթեթը պատրաստ կլինի մայիսից ոչ շուտ, և այս հարցը կարելի է նաև հանրաքվեի դնել՝ հանրության դիրքորոշումն իմանալու համար»,- կարծում է տիկին Զոհրաբյանը` հավելելով, որ իր համար հասկանալի չեն հայկական կողմի պնդումները, որ անպայման գնալու են Վիլնյուս. «Ես հասկանում եմ իմ եվրոպացի գործընկերների մտահոգությունը, որովհետև չորս տարի շատ արդյունավետ բանակցվել է այդ փաստաթղթի շուրջ»։ Ամեն դեպքում, նա կարծում է, որ Հայաստանը պետք է շարունակի Եվրամիության հետ գործակցությունը. «Իհարկե, հասկանալի է, որ Ասոցացման համաձայնագիրը չի կարող ստորագրվել, բայց որևէ փաստաթուղթ օրակարգում պետք է դրվի, որպեսզի Եվրոպայի հետ կապը չընդհատվի»։
ԲՀԿ խմբակցության պատգամավոր Վահե Հովհաննիսյանն էլ ասաց, որ ԲՀԿ-ում Մաքսային միությանն անդամակցելու հարցը չի քննարկվել, քանի որ չկա պատշաճ տեղեկատվություն։ Պատասխանելով ԼՂՀ-ին վերաբերվող հարցին՝ ասաց, որ ցանկացած քայլ, որ կանի ՀՀ-ն, պարտավոր է հաշվի առնել Ղարաբաղի շահերը։
Նա Հայաստանի`Մաքսային միությանն անդամակցությունը եւ չորս տարվա բանակցություններից հետո ԵՄ Ասոցացման համաձայնագրից ետ կանգնելը համարում է «արժանապատվության եւ վստահության կորուստ մեր եվրոպացի գործընկերների մոտ»:
Կարդացեք նաև
Նաիրա Զոհրաբյանը բացառեց որեւէ իրավիճակ, որ ԲՀԿ-ն կրկին համալրի կոալիցիայի շարքերը:
Նելլի ԳՐԻԳՈՐՅԱՆ
