ՀԱԿ-ի հույսն այն է, որ երկրում կզարգանան քաղաքացիական եւ քաղաքական հասարակությունները, եւ իրենք ի վերջո կհասնեն իշխանափոխության: Այսօր խորհրդարանական ճեպազրույցների ժամանակ նման կարծիք հայտնեց ՀԱԿ խմբակցության քարտուղար Արամ Մանուկյանը: Այս առումով, ըստ նրա, ամառը բավականին ակտիվ էր, ու դա լավ է: Ակտիվ սկսվեց նաեւ սեպտեմբերը, ինչը նա նույնպես բնական է համարում, քանի որ իշխանության «քյալլագյոզություններն» իրենց արդյունքը տալիս են: Նրա համոզմամբ՝ ՀՀԿ-ում հասունանում են լուրջ հակասություններ, ու դա երեւաց նաեւ ԱԳ նախարարի`խորհրդարանում պատգամավորների հետ ունեցած հանդիպումից, որին մասնակցում էր ՀՀԿ խմբակցության մեծամասնությունը.«Եկել էին տեղեկություններ ստանալու: Իրենք ոչինչ չգիտեն: Դա էր վկայում նաեւ մինչեւ Սարգսյանի հայտարարությունը`ՀՀԿ-ականների իրար հակասող հայտարարությունները: Սերժ Սարգսյանը ինքնուրույն որոշում է կայացրել: Շոկի մեջ է ամբողջ Հայաստանը, Եվրոպան, ՀՀԿ-ն»:
ՀԱԿ պատգամավորը գտնում է, որ իր Երեւան գալուց հետո Սարգսյանը գոնե բացատրություններ պիտի տար, բայց զբաղված էր դերասաններ ընդունելով. «Սա ծաղր է: Ծաղր է, մանավանդ, որ Մոսկվայի քաղաքապետ է շնորհավորում: Նայեք ՌԴ մարզերում ընտրությունների գրաֆիկը`իրեն ասեք, թող հերթով շնորհավորի: Պուտինը Տարոն շնորհավորե՞ց: Ա~յ քեզ բան»:
Նա զարմանում է ընդհանրապես, որ քաղաքական գործիչները մեկնաբանում են Մաքսային միության կամ ԵՄ-ի ասոցացման համաձայնագրերը, քանի որ ոչ ոք դրանց ծանոթ չէ ու չգիտե, թե ինչ մասին է խոսքը: Մանուկյանը հրաժարվեց այդ թեմային վերաբերվող հարցերին պատասխանել. «Հեղինեն ի՞նչ գիտի, ՀՅԴ-ն ի՞նչ գիտի, ես էլ չգիտեմ: Ձեր հարցերը էստեղ նստածներին պետք չէ տաք: Երկիրը ձեռից գնում ա, ինքը մեդալ ա տալիս սրան, մեդալ ա տալիս նրան, կամերայի առջեւ իրար գրկում ժպտում են»:
ՀԱԿ պատգամավորը մտահոգիչ է համարում դպրոցահասակների թվի նվազումը. Հայաստանի 1400 դպրոցներից 250 դպրոց առաջին դասարան չի ունեցել: Ուսումնասիրությունն արվել է վեց մարզերում: «Համաձայնեք, որ այդ երեխաները դժվար թե խոպան գնացած լինեն»,- հեգնեց Մանուկյանը: Այս համատեքստում նրան զարմացնում են սպասվող ներգաղթի մասին իշխանության հայտարարությունները:
Նելլի ԳՐԻԳՈՐՅԱՆ
