«Հայ ժողովուրդը պարտավոր է «ոչ» ասել Սիրիայում կատարվող եղեռնին, մենք պարտավոր ենք մեր «ոչ»-ն ասել, որ իմանան, որ մենք այս պահին զորակցություն ենք հայտնում Սիրիայի ժողովրդին, նրա ընտրված իշխանությանը, մենք չենք կարող անտեսել պատմության դասերը»,-այսօր այս մասին «Հենարան» մամուլի ակումբում ասաց պատմաբան Արմեն Կարապետյանը` նշելով, որ որքան էլ մեզ հրամցնեն, թե Սիրիայում տեղի ունեցող վայրագությունները ընդդիմության ընդվզման արդյունքն են, ապա չարաչար սխալվում են` հավանական չհամարելով, որ տեղի բնակչությունը նման կերպ կավերեր սեփական երկիրը: «Դրանք միջազգային վարձկաններն են, եւ շատ լավ գիտենք, թե ինչպես են այսօր ուրիշի երկիր ներխուժում եւ տվյալ երկիրը քանդում»,-ընդգծեց նա:
Վերջինս կարծում է, որ Սիրիայի դեպքերի հետեւում կանգնած է ոչ միայն ԱՄՆ-ն, այլեւ Թուրքիան եւ Ադրբեջանը. «Թուրքիան գործում է այնտեղ ակնհայտ կերպով, Ադրբեջանը առայժմ թաքուն, քանի որ Թուրքիայի հետ է: Թուրքիայի ակտիվությունն այս հարցում կայանում է նրանում, որպեսզի մերձավոր արեւելքում հայ համայնքները էլ ավելի թուլանան, կազմալուծվեն` սփռվելով ավելի հեռավոր երկրներ»,-ասաց նա` հավելելով, որ անհատապես կցանկանային օգնել Սիրիայի ժողովրդին, սակայն նրբանկատ ձեւով, որպեսզի Թուրքիայի կողմից այնտեղ չվերածվի հակահայկական հիստերիայի:
«Հայրենանվեր մահապարտներ» հայրենասիրական կազմակերպություն կենտրոնի նախագահ Արայիկ Սիմոնյանն էլ հանդես գալով կազմակերպության բոլոր անդամների անունից, ցանկություն հայտնեց, որ այս խնդիրը խաղաղ ճանապարհով լուծում ստանա:
Արմեն Կարապետյանն էլ չբացառեց, որ առաջիկայում ակցիաների տեսքով ցույցեր կլինեն` ի պաշտպանություն Սիրիայի դեպքերի խաղաղ կարգավորմանը` նկատելով, որ սա ոչ միայն մտավորականության եւ ազատամարտիկների խնդիրն է, այլ ողջ հայության: «Հայ մտավորականը պարտավոր է ձայն բարձրացնի: Այսօր մեզ համակիր է նաև Հայ գրողների միավորումը և համոզված եմ, որ էլի ուրիշ կազմակերպություններ կմիանան»:
Քրիստինա ՄԻՐԶՈՅԱՆ
