Այսօր կառավարության հետ հարցուպատասխանի ժամանակ ԱԺ «Ժառանգություն» խմբակցության պատգամավոր Ռուբիկ Հակոբյանը հետաքրքրվեց, թե ինչո՞ւ է ՀՀ արտաքին քաղաքական գիծը գաղտնի պահվում ժողովրդից կամ առնվազն «փոքր ածու» ընդդիմությունից:
Նա հետաքրքրվում էր, թե ինչու չեն հրապարակում այն փաստաթղթերը, որոնցով Հայաստանը հարաբերվում է Մաքսային միության հետ: Արտաքին գործերի նախարար Էդվարդ Նալբանդյանը պատասխանեց, որ առայժմ Մաքսային միության հետ որեւէ փաստաթուղթ չկա ստորագրած, միակ բանը, որ կա՝ ՌԴ եւ ՀՀ նախագահների՝ սեպտեմբերի 3-ին հրապարակած հռչակագիրն է՝ մտադրությունների մասին: «Երբ երեք երկրները (ՌԴ, Ղազախստան, Բելառուս-Մ.Բ.) կորոշեն, որ Հայաստանին ընդունում են Մաքսային միության մեջ, նոր կսկսվի փաստաթղթերի վրա աշխատանքը»,-ասաց ԱԳ նախարարը՝ նշելով, որ դա կլինի ոչ շուտ, քան հոկտեմբերի վերջին կամ նոյեմբերի սկզբին:
Մելանյա ԲԱՐՍԵՂՅԱՆ
