Սեպտեմբերի 11-ին ՀՀ ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը հանդիպեց ՀՀ-ում ԵՄ խորհրդատվական խմբի ԵՄ մոտարկման եւ կառավարման հարցերի խորհրդատու Իլմարս Սոլիմսի, Եվրոպական ժողովրդավարական կուսակցության եւ ԱԼԴԵ (Եվրոպական լիբերալների եւ դեմոկրատների դաշինք) խմբի անդամներ Խոսե Մարիա Էքստեբարիայի եւ Դենիս Բադրեի հետ:
Հանձնաժողովի նախագահ Նաիրա Զոհրաբյանը եվրոպացի հյուրերի հետ քննարկեց Հայաստանի` Մաքսային միությանը միանալու որոշումից հետո ստեղծված իրավիճակը, նշելով, որ չնայած ծագած որոշակի խնդիրների՝ մեր երկիրը կարեւորում է Եվրամիության հետ համագործակցությունը եւ երկխոսության շարունակականությունը տարբեր ուղղություններով, եւ Հայաստանը ցանկություն ունի մասնակցել Վիլնյուսի գագաթաժողովին: Անդրադառնալով Ռուսաստանի հետ հարաբերություններին՝ հանձնաժողովի նախագահը նշեց, որ չպետք է մոռանալ, որ Ռուսաստանը Հայաստանի ռազմավարական դաշնակիցն է, եւ հարաբերությունները Ռուսաստանի եւ ԵՄ-ի հետ պետք է լինեն հավասարակշռված եւ բալանսավորված: Նրա համոզմամբ՝ չպիտի մոռանալ, որ Հայաստանը ունի Լեռնային Ղարաբաղի խնդիր, ինչը հայ ժողովրդի համար կենսական հարց է, եւ այս առումով մեր երկիրը փոխզիջումների գնալ չի կարող: Նաիրա Զոհրաբյանի գնահատմամբ՝ այս ամենը հաշվի առնելով՝ մենք պիտի կարողանանք ճիշտ կառուցել հարաբերությունները եւ Ռուսաստանի, եւ ԵՄ-ի հետ:
Հանդիպման ընթացքում քննարկվեցին նաեւ միջկուսակցական համագործակցությանը վերաբերող հարցեր:
ԱԺ
