Այսօր խորհրդարանը սկսեց քննարկել իր մանդատով ՀՀ արդարադատության խորհրդում ներկայացուցիչների հաստատման հարցը:
Aravot.am-ն արդեն տեղեկացրել է, որ խորհրդում այսուհետ ներկայացված է լինելու նաեւ պետհամալսարանի իրավաբանական ֆակուլտետի դեկան Գագիկ Ղազինյանը: Նա կհամալրի վաղուց թափուր տեղը: Գրիշա Բադիրյանը, որն ԱԺ-ի կողմից նշանակված էր՝ կրկին կհաստատվի խորհրդում:
Մինչ գաղտնի ընտրությունը՝ խորհրդի անդամի թեկնածուներին հնարավորություն տրվեց ելույթ ունենալ և պատասխանել պատգամավորների հարցերին։ ՀԱԿ խմբակցության ղեկավար Լևոն Զուրաբյանը պետհամալսարանի իրավաբանական ֆակուլտետի դեկան Գագիկ Ղազինյանից հետաքրքրվեց`իր կարծիքով Արդարադատության խորհրդի անդամները կարո՞ղ են լուրջ ազդեցություն ունենալ դատավորների նշանակման գործում։ Նա հիշեցրեց, որ «մարտի 1-ի» դեպքով դատավարություններն ընթացել են օրենքի կոպտագույն խախտումներով, և դատավորներն ակնհայտ անարդար դատավճիռներ են կայացրել, չարաշահել են պաշտոնական դիրքը, խախտել են հավասարության եւ մի շարք այլ սկզբունքներ, ընդհուպ մինչեւ մերժելով վերջին խոսքի իրավունքը։
«Եթե ունենաք փաստեր, որ դատավորները կոպտագույն խախտումներ են թույլ տվել, ի՞նչ դիրքորոշում կունենաք»,- «քաղաքական համատեքստից» դուրս հարցրեց նա։
Գագիկ Ղազինյանն էլ հարցին պատասխանեց «իրավական ասպեկտում»: Ասաց, որ դատավորների կողմից խախտումներն ամրագրվում են կամ դառնում են հրապարակային՝ դատարանի կողմից վերջնական որոշման հիման վրա. «Եթե կլինեն վիճակներ, երբ փաստերը կլինեն ամրագրված, հիմնավորված և ապացուցված, և խախտում կատարած դատավորների ցուցակները կներկայացվեն Արդարադատության խորհուրդ, ապա խորհրդի անդամը կարող է իր կարծիքը հայտնել տվյալ անձի վարքագծի վերաբերյալ՝ նրա կայացրած վճիռների հիման վրա»:
Նելլի ԳՐԻԳՈՐՅԱՆ
