Այսօր «Հայելի» ակումբում ՀՀԿ-ական պատգամավոր Վարդան Այվազյանը խոսելով Մաքսային միության մասին՝ ասաց. «Եթե կամ-կամը դրված լիներ, ապա, իմ համոզմամբ միանշանակ պետք է լինի Մաքսային միությունը»:
Նրա ձեւակերպմամբ՝ մեզ համար խիստ կարեւոր է Արցախի հարցը, իսկ Ասոցացման համաձայնագիր շրջանակներում նախատեսվում է Հայաստան-Արցախ հստակ տարանջատում:
Ինչ վերաբերում է հայ-թուրքական սահմանի հետ կապված խնդրին՝ Այվազյանն ասաց, որ ՀՀ նախագահն ասել է, որ առանց սահմանների բացման խոսել Ասոցացման համաձայնագրի մասին` անհնար է:
Եթե քննարկվեր հասարակության հետ, ապա այդ գործընթացը երկար կտեւեր, չնայած Վարդան Այվազյանը չի համարում, որ այս գործընթացն ավարտված է:
«Ինչո՞ւ պետք է Ռուսաստանը մեզ գազը երկու-երեք անգամ էժան ծախի, քան Ուկրաինային, գեղեցիկ աչքերի՞, թե՞ խոսքերի համար»,- հարցնում է Այվազյանը՝ նշելով, որ Հայաստանի ազգաբնակչության երկու միլիոնը գտնվում է Ռուսաստանում, բա ինչու չեն ուրիշ տեղ գնում, ասում է նա՝ հավելելով, որ այսօր գյուղերում հիմնականում Ռուսաստանից են փող ստանում, խոշոր չափի ներդրումներն այնտեղից են կատարվում եւ այլն:
Ասոցացման համաձայնագիրը բաղկացած է 932 էջից՝ հայտարարեց Այվազյանը, նշելով, որ ինքը տեսել է այդ փաստաթուղթը ու հերքեց տեսակետն այն մասին, թե այն ոչ մեկին հայտնի չէ:
Եվա ՀԱԿՈԲՅԱՆ
