ԵԿՄ Լոռու մարզային խորհրդի նախագահ Կամո Հովհաննիսյանի կարծիքով ադրբեջանական կողմը օգտագործում է Հակոբ Ինջիղուլյանի` գերության մեջ գտնվելու փաստը` միջազգային հանրության առջեւ Հայաստանին վարկաբեկելու համար:
Aravot.am-ի հետ հարցազրույցում անդրադառնալով ադրբեջանական լրատվամիջոցներին հայ ռազմագերու տված ու համացանցում տարածված հարցազրույցներին` Կամո Հովհաննիսյանը նկատում է, որ ադրբեջանական կողմը այդկերպ ընդամենը իր քարոզչական մեքենան է աշխատեցնում`աշխարհի առաջ հայերին ու Հայաստանը բացասական երանգներով ցույց տալու համար:
«Ադրբեջանական կողմը փորձում է քարոզել, աշխարհի աչքին փորձում է մեզ` հայերիս, մեր բանակը վարկաբեկել, այսինքն` նա հնարավոր բոլոր տարբերակները փորձում է օգտագործել` մեր տնտեսությանը վնաս տալու, մեր վարկանիշը գցելու,մեր հասարակ քաղաքացու հոգեբանության վրա ազդելու համար: Հակոբ Ինջիղուլյանի գերի ընկնելու հանգամանքը եւս առիթ է»,-ասում է Կամո Հովհաննիսյանը:
Նա նկատում է, որ հայ ռազմագերու հետ կարող են եւ աշխատել են հատուկ ծառայություններ, վախեցրել, ահաբեկել նրան:
Կարդացեք նաև
«Հակոբ Ինջիղուլյանի հետ կարող են եւ աշխատել են հատուկ ծառայություններ, հնարավոր է, որ անգամ փորձել են վախեցնել` եթե վերադառնաս Հայաստան, քեզ կդատեն: Այդ համատեքստում չի բացառվում, որ անգամ կարող են համոզած լինել, որ Հակոբը հանձնվի 3-րդ երկիր, ստանա փախստականի կարգավիճակ: Այս եւ Հակոբ Ինջիղուլյանի բերանից հնչած ցանկացած ծրագրավորված հակահայկական միտք ուղղված է հենց Հայաստանի ու հայերի դեմ»,-ասում է Կամո Հովհաննիսյանը` հավելելով, որ այդ քայլերը լրատվական պատերազմի մի մասն են կազմում:
Անուշ ԲՈՒԼՂԱԴԱՐՅԱՆ
